Abertura Tinan pastorál no lansamentu sistema uniformizasaun administrasaun parokiál

 

 

Baucau – Sarani sira Dioseze Baucau husi zona Viqueque, Lospalos, Manatuto no Baucau,  hamutuk ho sira-nia Bibi-Atan D. Basílio no amlulik sira, ohin 16 Janeiru, halibur hamutuk iha saluan Dioseze nian atu loke ofisialmente Tinan Pastorál dedika ba família no lansamentu uniformizasaun administrasaun parokiál.

Dioseze Baucau iha tinan 17 nia laran halo nia dalan husi Igreja misionária (igreja padre no madre sira nian) ba Igreja Evanjelizadora (igreja leigu sira-nian)  ho prinsípiu solidariedade no subsidiariedade. Prinsípiu solidariedade husu atu komunidade hotu-hotu iha dioseze sente parte Kreda Dioseze nian no iha responsabilidade ba malu; subsidiariedade katak ita hotu tau ita-nia kbiit hamutuk, atu bainhira presiza ita bele tulun malu iha buat hotu ne’ebé ita kuran. Buat hotu tanba Krsitu bolu ita hotu ba nia Igreja no ba nia servisu.

Husi tinan 2009 liuhusi pastoral itinerante no sensibilizasaun sira ba fati-fatin atu amlulik no leigu sira ida-idak hatene ninia fatin no papél iha Igreja Komuñaun nian, dioseze haree katak presiza halo reforma ida pastorál diosezana hodi husu ba parókia hotu atu la’o hamutuk iha ideia, planu no asaun ida atu to’o ba finalidade ida. Alvu tinan pastorál 2014 mak Igreja Komuñaun nian. Dalan ida atu to’o ba alvu ne’e mak harii konsellu pastorál no konsellu ekonómiku, nune’e mós atensaun ba katekeze, pastorál família, nst.

Amu Basílio iha ninia liafuan sira hateten katak presiza halo reforma maibé difisil muda mentalidade… “La’ós administrasaun no reforma mak salva klamar sira. Maromak nia grasa mak salva, maibé presiza organiza an atu ita la gasta enerjia arbiru de’it hodi iha sinerjia atu to’o ba finalidade pastoral nian katak haklaken Kristu”.  Hafoin Amu-Bispu mós hateten katak atu bele implementa reforma nia kria “Komisaun  Estudu no Aplikasaun Reforma Pastorál Diosezana”. Nune’e komisaun ne’ebé kompostu husi amlulik diosezanu sira hanesan p. Mário Cabral, p. Arlindo, p. Tomás, p. Germano, p. Francisco hodi Bispu nia naran sei lori to’o rohan knar atu implementa reforma no halo fiskalizasaun atu bele haree oinsá projetu ne’e la’o ba oin.

Amu-Bispu Basílio mós fó motivasaun tansá Papa Francico dedika tinan ida-ne’e ba família sira. Ba Papa Francisco difikuldade hotu família hasoru mak atake ba valor ema nian, pesoa umana nian. No ema moris iha família, entaun atensaun tenke fó ba família nu’udar knuuk atu haburas ema.

Enkontru remata ho Amu-Bispu ne’ebé dere gong nu’udar abertura ba tinan pastorál no lansamentu reforma nian, hafoin almosu hamutuk.