Venilale- Iha sábadu 23 Marsu, Komunidade Edukativa Madre Mazzarello iha ninia Lectio Divina iha grupu asosiasaun nian reflete kona-ba Evanjellu Domingu III Kuarezma nian. Iha pasu Evanjellu ne’e, Jezús hodi refere ba akontesimentu krónaka nian (romanu sira ne’ebé hanehan iha Templu laran no trajédia vítima 18 ne’ebé Torre Siloé hanehan) nia haktuir ai-kanoik kona-ba ai-figeira ne’ebé la fó fuan. Nia hakarak evidensia liuliu “aspetu foun” ida kona-ba Maromak, Maromak ne’ebé domin no laran-sadia. Ai-kanoik iha mensajen rua: husi sorin ida patraun ne’ebé, haree katak nia la hetan ai-fuan husi ai-hun, dehan ba to’os-atan atu tesi tiha; husi sorin seluk patraun ne’ebé, rona tiha atan nia hapara desizaun atu tesi, hodi hein atu fó fuan. Ai-kanoik ninia sentru konvida ita atu hanoin hikas ita-nia modu moris nian, ba mudansa ita-nia moris nian, basá Na’i hakarak ita-nia konversaun. Konverte signifika troka atitude, orienta hikas ita-nia moris no koko haree sasán sira hanesan Nia haree. Konsiste iha esperimenta dala ida tan Na’i nia di’ak oinsá no buka mahan iha Nia. Konverte hakarak dehan deskobre Maromak ne’ebé hadomi ita, Jezús ne’ebé mate mai ita, husik mai ita don Eukaristia, kbiit ne’ebé tulun ita troka ita-nia moris no halo atu ita-nia “ai-figeira” fó fuan. Defaktu, Jezús iha pasiénsia, tau matan mai ita no tulun ita atu ita fó fuan. Se ita hateke ba ita-nia moris pesoál, ita bele haree oinsá Maromak iha nafatin pasiénsia rohan-laek mai ita, maski ita iha limite.  Carlo Acutis dehan: “Presiza halo ézodu husi salan ho firmeza. Sá loos benefísiu ba ema ida manán funu rihun ida se nia la iha kbiit atu manán nia an rasik?”.

Iha silénsiu, uluk, hafoin iha grupu, ida-idak reflete no fahe kona-ba pergunta rua tuirmai ne’e: Saida mak ha’u sei muda iha ha’u-nia moris? Sé no saida mak tulun ha’u atu halo mudansa ne’e?

Hotu-hotu kompara sira-nia moris ho ai-figeira Evanjellu nian ne’ebé Maromak hein atu fó fuan. Jezús mak Atan ne’ebé bele tulun atu ita-nia ai-figeira fó fuan ho ninia Liafuan, Eukaristia no Sakramentu Rekonsiliasaun. Empeñu ne’ebé asosiasaun sira foti atu troka moris iha semana ne’e mak “la ko’alia aat ema seluk nia moris, hakbesik Sakramentu Konfisaun” aleinde empeñu sira seluk halo ona iha semana rua nia laran.