Vizita família hodi rona difikuldade sira família ohin loron enfrenta

 

Baucau – Ho tinan eskolár foun, oratóriu mós hahú fali sira-nia atividade iha domingu 12 Janeiru, nune’e mós grupu Infánsia Misionária.

Komunidade FMA Baucau loke oratóriu rua: ida iha Teulale no ida iha Dewake.

Oratóriu Teulale nia responsavel mak irmán Teresinha no oratóriu Dewake nia responsavel mak irmán Miranda no irmán Ernestina, enkuantu irmán Albina anima grupu Infánsia Misionária parokiál. Iha mós foin-sa’e sira ne’ebé sai animadora no kolabora ho irmán sira, nune’e mós inan-aman sira ne’ebé halo parte ba komunidade edukativa. Oratorianu ne’ebé rejista husi sentru Teulale hamutuk 72 no husi sentru Dewake 50. Elementu grupu Infánsia hamutuk 50.

 

Iha tinan ne’ebé Kreda dedika atensaun tomak ba família, komunidade edukativa Baucau iha ninia planu pastorál tau nu’udar atividade vizita ba família sira iha zona pastorál parókia Baucau nian hamutuk ho oratorianu no labarik sira grupu Infánsia misionária nian. Nune’e ohin, 13 Janeiru, iha vizita ba família, labarik sira nia prezensa haksolok família sira hodi reza hamutuk ho sira. Irmán sira fali halo enkontru ho inan-aman sira hodi halo pergunta ruma ne’ebé Kreda universál haruka ba dioseze hotu atu hatán. Asuntu ne’ebé hetan liu foku mak problema kultura no tradisaun. Tuir família sira ne’ebé ohin irmán sira hasoru, obstákulu ba matrimóniu iha Igreja mak barlake no hakaran atu iha oan  molok kaben iha igreja. Ida-ne’e tanba bainhira kaben iha Igreja ne’e katak kazamentu ne’e to’o mate, maski la iha oan labele soe malu ona. Ko’alia kona-ba kama-rua…família sira hateten katak ne’e la’ós kultura maibé imoralidade. Ema sira moris tuir sira nia isin nia hakaran nune’e la fiél ba sira-nia promesa kabe-na’in nian. Família sira mós ko’alia kona-ba kestaun planeamentu familiár. Sira hotu konxiente kona-ba responsabilidade ba oan sira nia moris no edukasaun, nune’e presiza halo planu atu iha oan na’in hira tuir posibilidade ekonómika. Atu halo ne’e família sira la tuir de’it métodu naturál maibé mós métodu kontrasepsaun nian. Sira balun hateten katak, maski sira tuir métodu naturál, maibé tanba falla, sira halai ba métodu artifisiál.

Ikusmai família sira hanoin katak Kreda tenke fó atensaun boot liután ba formasaun vida konjugál la’ós de’it ba nubente sira maibé mós ba foin-sa’e sira ne’ebé sei sai família nia futuru. Kreda presiza hakbesik eh ba hasoru família sira iha sira nia uma hodi sai apoiu ba sira liuliu sira ne’ebé iha difikuldade.