Venilale – Lectio Divina iha preparasaun ba Semana II Kuarezma nian lori Komunidade Edukativa Escola Hotelaria e Turismo, Venilale, atu reflete no share kona-ba pasajen evanjélika Transfigurasaun nian. Evanjellu aprezenta mai ita Jezús iha foho Transfigurasaun nia leten, nabilan ho roman Maromak nian. Transfigurasaun mak meta (objetivu) ita-nia dalan Kuarezma nian: ita la’o ba ne’ebá. Loron sira ne’ebé haketak ita husi Páskua bele sai tebes duni dalan interiór loloos ida. Dalan ida sae foho nian ne’ebé husu atu hamamuk an.

Pergunta ne’ebé gia reflesaun sira mak tuirmai ne’e: “Imi sa’e ona ba foho Tabor iha imi-nia esperiénsia fiar nian? Saida mak ita presiza atu sae ba foho Tabor?”

Eukaristia domingu-domingu mak Tabor semanál ne’ebé halo ita haree naroman ida oinseluk  husi ita-nia ritmu moris loroloron nian. Iha liturjia divina Jezús sai dala ida tan roman ne’ebé leno ita-nia dalan hodi haraik mai ita ninia Liafuan no ninia Isin. Nune’e ita-nia moris sai oinseluk tanba Na’i nia glória moris-hi’as nian transfigura ita.

Nune’e iha sharing, estudente barak ko’alia kona-ba ba importánsia ba Missa, la’ós atu hasoru kolega sira de’it no konta istória ba malu, maibé atu bá rona Maromak nia Liafuan no simu Jezús nia Isin atu nune’e nakfilak moris.

Venerável Carlo Acutis husi tinan 12 la falta ninia enkontru ho Jezús iha Eukaristia, ne’ebé nia hateten nu’udar ninia “dalan [autoestrada] ba Lelehan”. Ninia mós fraze ne’e: “Hodi simu Eukaristia ita sai liután hanesan Jezús no iha rai ne’e ita esperimenta ona lalehan”. Nune’e, ninia konsellu ida ne’ebé sai segredu atu to’o lalais ba santidade mak ne’e: “Buka atu bá Santa Missa loroloron no halo Santa Komuñaun”.

Atu ita bele esperimenta Kristu nia Roman ne’ebé nakfilak ita hanesan eskolante sira iha foho Tabór iha ita-nia selebrasaun eukarístika sira.