Baucau – Nu’udar Instituto ne’ebé ho ninia karateristika misionaria, iha ne’ebé FMA nafatin kolabora ho Kreda lokál liuliu parokia ne’ebé mak ita hola parte. Tan ne’e mak iha loron 9-10 fulan Marsu husi Parokia Sant’António Baucau husu ba komunidade atu tulun katekista no “agentes pastorais” husi estasaun misionaria 13 parokia Sant’António Baucau nian, atu fó formasaun liturjiku baziku ba sira. Nune’e mak ir. Lucia Pereira, iha loron rua ne’e laran kolabora dedika nia tempu tomak hodi fó formasaun ba sira. Tema ba inkontro ida ne’e mak: ‘Re-Evanjelizasaun” nune’e Ir. Lucia eko fila fali liturjia báziku ne’ebé mak iha tinan 2017 Ekipa inter-ambitu prepara atu fó formasaun ba sarani sira, liuliu atu kolabora ho Parokia atu atu sensibiliza sarani sira kona-ba misa loroloron nian. Iha tinan 2017, komunidade lahalo tanba iha buat barak, maibé iha tinan ida ne’e koko hodi aplika fila fali. Maske iha livriñu ne’ebé inter-ambito uluk prepara ne’e simplis maibé justifika ho dokumentu Kreda nian. Nune’e iha loron rua ne’ebé mak hala’o formasaun ida ne’e haree katak ema sira ne’ebé tuir senti satisfeitu, tanba sira rasik deha katak buat barak mak ami hatene maibé ladun kle’an hanesan agora ne’ebé ami hatene ka deskobre liuhusi konferensia ne’ebé mak madre fó ba ami. Hotu tiha konferensia sira mós husu manual nune’e ekipa pastoral parokia nian prepara livru ba ema ida-ida atu lori tanba sira mak sei fó formasaun liturjika baziku ne’e iha sira-nia estasaun sira.

Tanba formasaun ne’e loron rua nia laran, nune’e ekipa mós prepara sertifikadu ba sira nu’udar sinal rekonesimentu ba sira atu sira bele hala’o sira-nia knaar ho impeñu no responsabilidade. Hotu tiha han meudia ema ida-ida simu ninia sertifikadu husi Padre Paroku, Pe. Manuel ximenes no me. Lucia nu’udar formadora, hafoin ikus halo foto hamutuk hodi halo rekordasaun ba loron hirak ne’e nian.

(FMA Baucau)