Venilale – Tuir programasaun Komunidade Edukativa Madre Mazzarello Venilale nian, pontu ida mak aprezenta modelu santidade juveníl, no ba tinan ne’e hili Venerável Carlo Acutis, adolexente ida mate ho tinan 15 tanba leucemia agresiva. Nune’e, iha tempu Kuarezma nian ne’e, sábadu-sábadu, foin-sa’e sira no edukadór/a sira halo Lectio Divina kona-ba Evanjellu domingu nian no konfronta ho Carlo Acutis nia moris. Atu hanesan Carlo, jerasaun dijitál sira hetan inspirasaun ba santidade, tuir Maromak nia Liafuan rasik hateten iha Lv 19,2: “Imi sai santu basá, Ha’u, Na’i imi-nia Maromak santu”.

Carlo Acutis: apaixonadu ba internet no ba Eukaristia

Iha loron 5 Jullu 2018, Papa Francisco autoriza promulgasaun dekretu virtude eroika foin-sa’e na’in tolu hamutuk ho Carlo Acutis, adolexente ida moris iha Londres 3 Maiu 1991, husi inan-aman milaneze (Itália). Husi loron nia halo Primeira Komuñaun ho tinan hitu de’it, Carlo nunka falta ba ninia enkontru loroloron ho Jezús Eukaristia iha Santa Missa. Antes ka depoizde selebrasunu eukarístika, nia hela iha sakráriu oin atu adora Na’i. Na’i-Feto mak ninia konfidente boot no nia nunka haluha onra iha rozáriu loroloron.

Carlo ninia modernidade no atualidade armoniza perfeitamente ho ninia vida eukarístika no ninia devosaun mariana, ne’ebé kontribui atu halo nia sai adolexente ida ne’ebé ema hotu admira no hadomi. No mai ita, Carlo nia moris hatudu atualidade Don Bosco nia sistema edukativu no espiritualidade, ohin loron mós.

Carlo repete ba ninia belun sira: “Ita-nia meta tenkéser infinitu, la’ós finitu. Infinitu mak ita-nia pátria. Lalehan hein ita horiuluk kedas”. Ninia fraze mós: “Hotu-hotu moris nu’udar orijinál maibé barak mate nu’udar fotokópia”. Atu bá to’o meta ne’e no la “mate nu’udar fotokópia”, Carlo esplika katak ita-nia busóla tenkéser Maromak nia Liafuan, atu ita hodi konfronta. Nune’e, atu atinji meta ida aas hanesan ne’e presiza meiu espesiál liu: sakramentu sira no orasaun. Carlo tau iha nia moris nia sentru sakramentu Eukaristia, ne’ebé nia hanaran “ha’u-nia auto-estrada ba Lalehan”.

Carlo, ho tinan 14, matrikula iha liceo klasiku “Leone XIII” Milano nian, ne’ebe Jezuita sira mak kaer. Nia enfrenta devér sira estudu nian ho badinas no hakmatek, hodi hetan nafatin tempu atu halo buat barak: hanorin katesizmu ba foin-sa’e sira Krizma nian nst. Ninia paixaun ida mak informátika, halo ninia belun no adultu sira ne’ebé iha lisensiatura iha enjeñaria informátika konsidera nia jéniu ida. Carlo nia interese mak programasaun computer nian, montajen film, kriasaun website sira nune’e mós kria boletín informativu sira – ne’ebé nia mak haree ba redasaun no aprezentasaun gráfika – aleinde voluntariadu afavór ba ema ne’ebé presiza, labarik sira no idozu sira. Nia kria site ida atu habelar devosaun eukarístika iha internet, http://www.miracolieucaristici.org/..

Foin-sa’e fiél husi dioseze Milano nian ida-ne’e, molok mate, afirma: “sai nafatin ida de’it ho Jezús, ne’e mak ha’u-nia projetu moris nian”. Ho liafuan uitoan sira-ne’e, iha faze final ninia leucemia nian, nia trasa kuadru karakterístiku ida ninia ezisténsia badak iha rai ne’e: moris iha Jezús, ba Jezús, ho Jezús.

“Ha’u kontente atu mate tanba iha ha’u-nia moris ha’u la estraga nein momentu ida ho buat sira ne’ebé la haksolok Maromak”. Iha-nia terus maka’as moras nian nia hateten: “Ha’u oferese terus hotu ha’u tenke liu ba Na’i, ba Amu-Papa no ba Kreda, atu la halo Purgatóriu no bá loos Lalehan”.

Carlo husu atu ita tranzmiti Evanjellu ho ita-nia moris, atu ita ida-idak sai faról ne’ebé leno ema seluk nia dalan. No iha tempu informátika nian, iha ne’ebé realidade dijitál sai ambiente moris foin-sa’e sira no ema hotu nian, nativu dijitál sira bele sai misionária ksolok no esperansa nian.