Dili – Formasaun permanente mak hilin ida  ne’ebé  uluknanai mai husi konviksaun katak moris hahoris moris; aleinde ne’e, formasaun permanente hatán di’ak liután ba sensibilidade kulturál  ne’ebé  haree prosesu edukasaun permanente nu’udar xave atu bele hasoru dezafiu sira iha sosiedade kompleksu ida.

Nune’e mak Inspetoria FMA TIN iha ninia planu formasuan nian la halo de’it formasaun inisiál maibé mós formasuan kontínua ba etapa hotu moris relijioza nian.

 

Ba ne’e mak iha loron 11 Janeiru, irmán votu temporáriu na’in 12 husi kongregasaun tolu (Saleziana, Concepcionista no Frasiscana) hahú kursu bienál ba juniora sira iha komunidade Divina Providénsia, Dili-Comoro. Matéria sira ne’ebé oferese iha kursu ida ne’e maka tuir mai ne’e:

• Introdusaun ba Filozofia- Padre Agung SDB
• Teolojia Morál – Padre Helio SDB
• Matemátika – Profesor Lino do Rosário (UNTL)
• Psikolojia dezenvolvimentu umanu – Irmán Esmeralda Soares FMA

Objetivu kursu ida ne’e mak oferese formasaun ba irmán juniora sira atu hametin koñesimentu báziku sira ne’ebé irmán simu iha eskola sekundária; favorese koñesimentu kona-ba irmán nia an rasik no dezenvolvimentu kapasidade sira nian; hakle’an matéria kulturál, antopolójika no pedagójika ne’ebé tulun atu interpreta realidade ohin loron nian no fó kualidade ba misaun apostólika.