Baucau – Instituto Católico para a Formação de Professores- ICFP- Baucau, mak Institutu ida ne’ebé prepara rekursu umanu ba edukasaun báziku.

Iha loron 2 Marsu 2019, Institutu orgullu tanba fó graduasaun ba finalista sira iha programa Bacharelato no Lisensiatura nian. Bacharelato hamutuk nain 54 no Lisensiatura nain 27. Entre graduadu sira ne’e iha mós Irmán FMA nain 4.

Serimónia graduasaun hahú ho Santa Misa, ne’ebé preside husi Amu Vigáriu Jerál Dioseze Baucau, Pe. Francisco Pinheiro. Iha homilia amu selebrante afirma kona-ba matenek ne’ebé loos tuir Bíblia katak; la haree ba skill no talentu ema nian, maibé haree liu ba atitude moris nian, oinsá ema harii relasaun di’ak ho ema seluk. Nune’e mós matenek ne’e lori ita atu hatene hahí no fó glória ba Ida ne’ebé matenek nia hun.

Depoizde Santa Misa kontinua ho serimónia graduasaun nian iha merkadu munisipál Baucau. Hanesan tinan-tinan, oradór no bainaka espesiál mak: doadores sira mai husi Australia, reprezentante Ministeriu Edukasaun husi nasionál no munisipiu, koordenadór sira eskola ensinu báziku nian iha Baucau laran no mós autoridade lokal sira.

Iha serimónia ne’e sra. Ema Guterres, reprezentante husi fundasaun ALOLA  no mós antiga aluna ICFP, rekomenda ba graduadu sira atu sai edukadór/a ne’ebé profisionál no pontuál. Prontu atu lori mudansa ba eskola sira ne’ebé dala barak abandona  iha parte sanitárau, dixiplina, jestaun turma no kria klima relasaun amizade ne’ebé di’ak entre manorin no kanorin.

(Alice Filipe Gama)