Dili – Iha loron 26 Fevereiro  mak loron furak ba Irmán sira iha Komunidade Saun Jose Komoro, tamba iha loro kraik tuku 18:30 Mons. Mario Codamo  ba selebra Misa ikus nian ho Irman sira hodi despede sira. Mons. Codamo sei muda fali ba Corea. Iha Misa Nia agradese Maromak ba oportunidade bele hela iha Timor durante tinan tolu. Fofoun simu mandato husi Amu-Papa atu mai Timor nia sente hanesan kastigu maibé ikus mai nia deskobre katak nia halo esperiénsia di’ak iha ne’e. Nia hare katak Timor riku ho Vokasaun Relijoiza no saserdotál, buras iha fiar no iha buat di’ak barak nia hare iha ne’e.

Depoizde Misa, iha jantar hamutuk ho Irmán sira no kontinua ho Irmán sira komprimenta Monseñor ho kántiku no dansa, hafoin fó rekordasaun tais Timor nian nu’udar sinál Agradesimentu nian ba di’ak hotu ne’ebé Monseñor halo ba Komunidade, liuliu selebra Misa no relasaun di’ak ne’ebé durante ne’e sira esperiénsia.

Iha lia fuan ikus depoizde jantar Monseñor dehan: nia sei sente “tanta saudades” tamba iha ne’e ita bele hasoru ema no bele ajuda  ho buat ne’ebé nia  bele. Nia dehan tan, ho imi hau bele halo esperiénsia furak, serena no agradese mós Madre Alma no mós Madre sira hotu liu-liu iha Venilale, Kailaku no sira seluk. Kumprimentus mos ba Madre sira hotu. Agradese mos ba han kalan nian no nia sei ba Corea iha loron 4 Marsu, nia husu ita nia orasaun iha nia misaun foun.

“Grazie, Grazie Ci vediamo. GRAZIE!”

(Noemia de Deus)