Selebrasaun Epifania

RV – Iha segunda, 6 Janeiru, Papa Francisco prezide Misa iha Bazília S. Pedro, hodi selebra Solenidade Epifania nian. Iha omilia, nia destaka nesesidade atu tuir Kristu nia roman no proteje nafatin fiar.

Santu Padre konsentra iha matenek-na’in sira Lorosa’e nia ezemplu, ne’ebé tuir fitun nia roman atu to’o ba Kristu bainhira nia moris. Iha perkursu ne’e, Amu-Papa esplika, matenek-na’in sira ne’e simboliza ita ida-idak nia destinu.

Asesu omilia iha lia-portugés

Iha sentidu ne’e, Francisco halo ema na’in ne’e nia retratu nu’udar maluk matenek-na’in iha ita-nia dalan, basá sira husik hela hanorin boboot mai ema sira. “Sira-nia ezemplu tulun ita atu hateke ba fitun no tuir hakaran/dezeju boot sira ita-nia fuan nian. Sira hanorin ita atu keta haksolok ho mida medíokre, maibé husik nia halai tuir ba beibeik buat ne’ebé di’ak, loos, furak, Maromak, nu’udar buat sira-ne’e hotu”.

Hanorin seluk husi ema na’in tolu husi lorosa’e, ne’ebé Papa Francisco resalta, mak keta husik aparénsia lohi ita. Nia fó hanoin, katak, iha momentu ida matenek-na’in sira lakon tiha fitun, basá nia la horik iha liurai Erodes nia kadunan, iha-ne’ebé ukun nakukun. Maibé sira uza “santa astúcia” (matenek santu) atu rekoñese no evita perigu.

“Matenek-na’in sira hatene supera momentu nakukun nian hamutuk ho Erodes, tanba sira fiar iha Eskritura sira, iha profeta nia liafuan sira, ne’ebé hatudu Belém nu’udar fatin moris Mesias nian”.

No atu la husik aparénsia lohi, Francisco destaka nesesidade atu sai matan moris, hein no rona Maromak ne’ebé ko’alia ba ema. Tuir nia, presiza bá liu nakukun, aleinde mundanidade no proteje grasa katak fiar ho orasaun, domin no karidade.

“Tuir matenek-na’in sira nia ezemplu, ho ita-nia naroman ki’ik, ita buka Naroman no proteje ita-nia fiar. Assim seja”