Tema sentrál liturjia domingu ne’e nian konvida ita atu reflete kona-ba kestaun ida-ne’e: buat ne’ebé hakonu fuan no ita fó sasin mak lia-loos Jezús nian, ka ita-nia interese no ita-nia kritéiru egoísta sira?

Evanjellu fó mai ita kritériu sira atu dixerne “mestre” loos husi ida falsu: “mestre” loos mak ida ne’ebé aprezenta Jezús nia proposta hodi hamosu komuñaun, uniaun, fraternidade, domin ho ninia sasin; “mestre” falsu mak ida-ne’ebé hatudu intoleránsia, ipokrizia, autoritarizmu no ninia sasin hamosu divizaun no konfuzaun sira: ninia anúnsiu la iha ligasaun ida ho Jezús.

Leitura dahuluk, iha liña hanesan, fó konsellu ida prátiku liu, maibé mós útil liu: ita labele julga ema sira ho impresaun dahuluk ka tan atitude sira maizumenus teatrál sira: ita husik sira ko’alia, basá liafuan sira hatudu lia-loos ka lia-bosok ne’ebé iha fuan laran.

Leitura daruak aparentemente la iha ligasaun ho temátika ida-ne’e: leitura ne’e mak konkluzaun ba Paulo nia katekze kona-ba moris-hi’as. Maski nune’e, ita bele dehan katak moris no fó sasin ho lia-loos, sinseridade no koerénsia kona-ba Jezús nia proposta mak dalan nesesáriu ba moris nakonu ne’ebé Maromak rezerva mai ita. Husi ita-nia anúnsiu sinseru kona-ba Jezús, mak moris komunidade ida-ne’e.

Download