Baucau – Komisaun Juventude Dioseze Baucau nian organiza kongresu datoluk FOSKA Dioseze Baucau ne’ebé hahú horisehik kalan, 6 Janeiru 2014 ho  orasaun Taizé no sei remata iha kinta, 9 Janeiru ho selebrasaun Eukarístika.  Tema jerál ba kongresu mak “La’o rai tan Kristu” (kf Mt 28,19).

Joven husi parókia no kuaze parókia sira pertense ba dioseze Baucau hamutuk na’in 300 halibur atu reflete kona-ba FOSKA nia identidade, dezafiu  no oportunidade sira ohin loron nian hodi haree sá loos prioridade no ain-hakat sira presiza foti ba tinan tolu mai oin.

Iha loron ohin kongresista sira simu input 3 kona-ba “Dezafiu no oportunidade ba Pastorál Juveníl iha Igreja no Nasaun Timor-Leste”’;“Funsionamentu Organizasaun ba Dezenvolvimentu Lideransa Juventude”; “Jezús bolu joven atu sai masin no naroman ba família”.

Entre sira ne’ebé ko’alia ba foin-sa’e sira ida mak irmán Jacinta Gusmão FMA ne’ebé hato’o tema “Dezafiu no oportunidade ba Pastorál Juveníl iha Igreja no Nasaun Timor-Leste”’ . Iha ninia input, nia hahú hodi husu ba foin-sa’e sira sá loos persesaun ne’ebé sira iha kona-ba an rasik. Liuhusi diálogu foin-sa’e sira reprezenta distritu ida-idak hato’o sá mak sira hanoin kona-ba sira nia an. Sira hotu konvensidu katak sira nia knaar mak agora prepara an atu realiza Maromak nia projetu ba sira hodi bele hala’o misaun ne’e durante sira nia moris iha rai hodi dezenvolve an rasik, família, no rai doben Timor-Leste.

Hafoin hodi uza metodolojia SWOT (Strengths, Weknesess, Opportunities, Threats) irmán Jacinta lori joven sira atu halo leitura realidade kontestu nian no Foska nian: Sá de’it mak Foska nia pontu forsa ne’ebé tulun realiza objetivu  Foska nian no pontu fraku sira ne’ebé teri netik ninia realizasaun no sá de’it mak oportunidade sira ambiente oferese no sá de’it ameasa sira mai husi ambiente (sósiu-kulturál, polítiku, media, nst). Husi leitura realidade mak Foska sei identifika no hili prioridade sira atu tau iha sira nia planu estratéjiku hodi hili ain-hakat sira atu to’o ba objetivu sira.

Iha  sesaun pergunta nian, foin-sa’e barak mak hato’o  pergunta liga ho komportamentu violentu foin-sa’e sira-nian, kona-ba joven sira ne’ebé la tama iha grupu sira nein governu nein Kreda nian, kona-ba oinsá Foska ninia empeñu atu hala’o asaun pastorál ho di’ak, ho efetivu no ho kompromisu. Joven balun preokupa ho fiar sarani ne’ebé oras ne’e sai malirin liután, kona-ba amlulik no ema konsagradu sira-nia moris iha infidelidade no la fó sasin di’ak.

Sesaun irmán Jacinta nian taka ho agradesimentu husi parte Foska nian ho knanauk no rekordasaun tais ida.