Liturjia domingu ne’e nian ezije husi ita domin totál, domin lahó limite, maski ba funu-baluk mós. Nia konvida ita atu tau sees lójika violénsia nian no troka ho lójika domin nian.

Leitura dahuluk aprezenta mai ita ezemplu konkretu mane ida ho fuan boot (David) ne’ebé, maski iha posibilidade atu elimina ninia inimigu, nia hili perdaun.

Evanjellu reforsa proposta ida-ne’e. Nia ezije Jezús nia maktuir sira atu iha fuan ida nafatin disponivel atu perdua, atu hili, atu lolo liman, independentemente husi sé mak iha oin. La’ós de’it hadomi membru grupu sosiál rasik, rasa rasik, povu rasik, partidu, igreja ka klube futeból rasik: ne’e mak domin lahó diskriminasaun sira, ne’ebé lori ita atu haree iha ema ida-idak – maski inimigu – ita-nia maun-alin.

Leitura daruak kontinua katekeze ne’ebé hahú domingu ruma liubá kona-ba moris-hi’as. Ita bele liga nia ho tema sentrál Maromak nia Liafuan domingu ne’e nian – domin ba funu-baluk sira – hodi dehan katak iha lójika domin nian mak ita prepara moris nakonu Maromak rezerva mai ita; no katak domin moris ho radikalidade no lahó limitasaun sira mak anúnsiu ida mundu foun ne’ebé hein ita liutiha rai ida-ne’e.

Download