Bispu nia knaar mak lori ema ba enkontru ho Kristu

 

Baucau – Sarani Baucau sira haksolok hamutuk ho ninia Mahein D. Basílio do Nascimento atu agradese Maromak ba tinan 17 ninia ordenasaun episkopál ne’ebé halo iha Roma iha loron 6 Janeiru 1997, maski Baucau sai dioseze iha loron 30 Novembru 1996. Selebrasaun loron 6 Janeiru 2014, hahú ho Misa agradesimentu iha katedrál Baucau ho prezensa amlulik sira-nian, relijioza no relijiozu sira no mós sarani sira.

Amu Basílio iha ninia omilia hato’o obrigadu barak ba sarani sira nia prezensa, orasaun no mai hamutuk ho nia atu hasa’e agradese ba Maromak. Hodi hanoin fali leitura Evanjellu ba solenidade epifania,  nia komenta katak ema matenek na’in tolu ne’ebé buka Jezús hanorin buat ruma mai ita. Hetan malu tiha ho Jezús sira troka sira-nia dalan, la liu ona husi dalan uluk.

Iha Bíblia tomak hatudu oinsá ema barak halo tiha enkontru ho Maromak sira muda sira-nia moris, hanesan Na’i-Feto no S. José, S. Paulo. Ita haree ema sira ne’ebé hasoru malu ho Maromak fila fali husi dalan seluk. Ida-ne’e mak hanaran konversaun, “metanoia”. Nune’e konvite ida ba ema hotu atu buka beibeik tempu atu hasoru malu ho Maromak, atu ita fó ba Nia buat ne’ebé Nia hakarak tanba domin, la’ós fó buat ne’ebé ita hakarak. Maibé mudansa ida-ne’e, transformasaun ida-ne’e, konversaun ida-ne’e tenke hahú husi kakutak to’o hahalok. Ikusmai nia konvida atu husu Na’i Jezús grasa atu iha korajen ba halo konversaun sai realidade iha moris, iha servisu, iha knaar no iha fatin hotu ita horik bá.

 

Iha nia knaar nu’udar Bispu, dezafiu boot liu mak “halo povu sai santu”.  Bispu nia knnar boot liu mak sai apóstolu nia saseluk atu haklaken no hatutan Maromak nia Liafuan, lori maun-alin sira ba Kristu. Ida-ne’e bispu hala’o hodi amlulik sira nia tulun, konsagradu/a sira no sarani tomak ne’ebé iha kompromisu iha movimentu sira, asosiasaun sarani nian, grupu espirituál sira, katekista, mestra, eskola no buat hotu iha Kreda.

Festa kontinua ho paseiu ba tasi Baucau nian besik área Bondura, katak liu tiha Wata-Boo. Amu-Bispu nia konvidadu onra nian mak komersiante ferik no katuas sira husi Hali-Laran, Vila Antiga nian. Animasaun iha tasi halo ho múzika, dansa, jogu, nune’e mós paseiu ho bero no nani iha tasi.

Iha loraik, iha Dioseze Baucau loke eventu seluk importante ba Foin-sa’e Katólika (FOSKA) liuhusi Komisaun Juventude diosezana ho abertura kongresu datoluk ho tema “La’o Rai tan Kristu”. Abertura hahú ho orasaun Taizé nian ne’ebé FOSKA Laga mak anima. Kongresu ne’e sei remata iha loron kinta mai.