Maromak nia Liafuan ne’ebé propoin mai ita domingu ida-ne’e, lori ita atu reflete kona-ba protagonizmu ne’ebé Maromak no ninia proposta iha ba ita-nia moris.

Leitura dahuluk  tau iha konfrontu autosufisiénsia ne’ebé ema balun iha hodi sees an husi Maromak no hili atu la tuir ninia proposta sira, ho ema sira ne’ebé hili atu konfia iha Maromak no entrega sira-nia an iha ninia liman. Profeta Jeremias aviza katak haketak an husik Maromak signifika la’o iha dalan mate nian no hakribi ksolok no moris nakonu.

Evanjellu proklama “haksolok” ema sira ne’ebé hari’i sira-nia moris iha valór sira ne’ebé Maromak propoin no ksolok-laek sira ne’ebé prefere egoízmu, orgullu no autosufisiénsia. Evanjellu sujere katak Maromak nia preferidu mak sira ne’ebé moris iha simplisidade, iha umildade no iha debilidade, maski, tuir mundu nia kritériu sira, ema sira-ne’e desgrasadu, marjinál, la iha kbiit atu halo emboot sira ne’ebé kaer mundu nia destinu rona sira-nia lian.

Leitura daruak, hodi ko’alia kona-ba moris-hi’as – konsekuénsia husi Kristu nia moris-hi’as –, sujere katak ita labele lee ita-nia moris tuir loos de’it kritériu sira mundu ne’e nian: ita-nia moris atinji ninia sentidu nakonu no totál bainhira, hodi moris-hi’as, ita natubu ba Ema Foun. Ida-ne’e akontese de’it se ita la konforma an ho mundu ne’e nia lójika, maibé lori ita-nia ezisténsia ba Maromak no ba moris nakonu ne’ebé Nia iha mai ita.

Download