Dili – Ohin 09- Fevereiru-2019, komunidade Beata Eusebia  Palomino selebra festa  mahein ba komunidade nian. Selebrasaun hahu misa iha dader tuku 08.30 hafoin iha mos seminar kona ba “ Vantajen no desvantajen Teknolojia informasaun”. Partisipa iha selebrasaun ne’e  mak alunos sira husi grupo asossiasaun Domingos Savio, Laura Vicuña, Don Bosco, Infansia no adolescente missionario, alunos sira husi 3 ciclo, Komunidade Edukativa, professores  no trabalhadores sira. Iha selebrasaun Eukaristia preside husi Padre João Roque, SDB. Buat ne’ebé interesante iha selebrasaun Eukaristia mak labarik sira hotu-hotu hakmatek no nonok wainhira Padre hahu omilia,  tanba atu hahu omilia Padre fo hanoin kedas ba labarik sira katak: “ Ha’u  babain  reza missa ba labarik sira, ha’u sempre lori fatuk boot ida, atu nune’e labarik se mak lahakmatek, ha’u sei bolu  nia mai oin, hafoin dere fatuk ba nia ulun atu nia hakmatek, hodi rona padre  nia rekomendasaun ida ne’e labarik hotu hakmatek no rona didi’ak Padre nia omilia. Padre hahu hodi introduz oituan kona ba Beata Eusebia nia moris no ninia identidade, hafoin hatutan tan katak Eusebia mai husi família kiak maibé nia bele sai santa/ beata tanba ninia esforsu makas, liuliu mak halo di’ak iha nia moris, haksolok ho moris ne’ebé kiak no haksolok ho ninia família, ninia papa Agostinho Palomino mos tulun barak nia atu sai  santa, wainhira fila husi serbisu ninia papa nafatin lori katesismu atu hanorin ba nia oan sira, tanba ninia vertude di’ak sira nune’e nia sai beata, entaun ba imi ida-idak mos iha direitu atu sai santo/a hanesan Reitór-Mor  ninia estreia ne’ebé dehan : “ Santidade ba o Mos”, nune’e ba ita hotu professores sira, alunos sira, madre sira ita hotu-hotu Maromak bolu atu santo/a, hanesan ita nia fundador Saun João Bosco dehan atu  sai santu importante mak halo didi’ak imi nia knar, se ha’u dasa rai karik ,halo ho di’ak,  estuda didi’ak, prepara didi’ak planu lisaun molok hanorin, nst.  Mai ita fo obrigado ba Maromak liu husi intersesaun Beata Eusebia ba eskola ida ne’e, madre, professores no alunos hotu atu nune’e bele imita loloos Beata Eusebia ninia moris no ninia virtude sira.

Hafoin misa remata kontinua kedas ho seminar kona ba “ vantazen no desvantazen teknologia informasaun” ne’ebé aprezenta husi Senhor. Abrão Ximenes, ne’ebé serbisu iha Banko Central iha area telekomunikasaun. Seminar ida ne’e realiza atu hatán ba projetu K.E 2019 nian, ne’ebé propoin hala’o seminar kona ba media komunikasaun. Métodu ba aprezentasaun ho powerpoint, aprezentasaun badak maibé interativu, iha perguntas barak husi membru K.E ne’ebé kuriozu tebes atu hatene kona ba media, liuliu iha área komunikasaun uza internet, HP, Faceebook, Twiter, WhatsApp nst.

Impaktu uzu internet no rede sosiál

 Impaktu Pozitivu:

• Fasilita komunikasaun
• Fasilita haruka/troka Informasaun
• Fasilita hodi buka Informasaun
• Fasilita hodi hetan Informasaun husi rai seluk
• Fasilita Informasaun area Edukasaun, Kultura, Turizmu no seluk tan
• Fasilita negosiu e transaksaun

Impaktu Negativu:

• Interaksaun ho ema dook, Ignora ema hamrik/tur sorin
• Komunikasaun uza teknologia, hamenus Face to Face
• Toman aat(Vísiu)- Pornografia, Joga online, Game online & Facebook)
• Prostituisaun online
• Espalhasaun doutrina ekstrime (Politika, Ideologia, Religius)
• Espalha maneira halo Kilat, bomba, Narkoba no seluk tan
• Fraude(Penipuan)
• Carding
• Crime Cybernetiku

(Maria Sarmento Guterres)