Venilale – Selebrasaun Festa Laura Vicuña nian koinside ho loron dahuluk novena nian ba Don Bosco. Nune’e, mak ohin, Família Saleziana halibur hamutuk atu hahí Maromak ba don santidade nian nu’udar fuan karizma salezianu, katak, fuan husi Don Bosco nia Sistema Preventivu, ninia pedagojia. Iha tinan ne’e, Estréia Reitór-Mor nian kona-ba santidade hatudu karakterístika eh itineráriu oioin sai santa iha Família Saleziana nia istória. Reitór-Mor sita foin-sa’e sira nia santidade “iha ita-uma” hanesan Domenico Savio, Laura Vicuña, Zeferino Namuncurá, Oratorianu na’in lima, nst.

Nune’e, iha loron dahuluk Novena nian, konvite atu reflete kona-ba Laura Vicuña nia santidade. Beata Laura Vicuña nia itineráriu santidade nian mak santidade vitimál-oblativa (sakrifika an) no santidade iha “família kanek”. Laura ne’ebé moris iha Chile iha 1891, la koñese nia aman; no nia inan hahú iha Argentina konvivénsia ho proprietáriu riku Manuel Mora. Laura, sente kanek ho situasaun irregularidade morál nia inan nian, oferese moris ba nia inan.

Iha Missa konselebrada, ho selebrante prinsipál Pe. Abrão, nia ko’alia katak “Fundadór hatudu dalan santidade no nia rasik moris dalan santidade nian”. Tuir Pe Abrão, “atu sai santu la presiza doutorammentu, osan barak. Don Bosco hanorin dalan simples. Kristaun nia aimoruk ba dalan santidade mak orasaun no asaun karidade nian. Na’i Jezús rasik fó ezemplu ho ai-kanoik Samaritanu di’ak”. “Ita hirak iha asrama iha oportunidade atu halo orasaun no karidade. Basá S. Paulo dehan katak, fiar de’it la to’o, tenke halo karidade”, Pe.Abrão subliña tan.

Depoizde Novena no Eukaristia, iha komunidade Madre Mazzarello, iha kalan halo rekreiu anima husi asosiasaun Laura. Grupu ida-idak aprezenta aspetu ruma kona-ba Laura nia moris ho knananuk, dansa, teatru, jogu. Loloos, molok festa, estudante sira ETV nian komesa ona koñese Laura nia moris liuhusi ninia film.

Atu taka festa, Ir Jacinta Gusmão iha ninia “buonanotte”, husu atu menina ida-idak buka oinsá moris santidade iha “uma” ne’e, hanesan Laura Vicuña halo durante iha koléjiu FMA nian. Nia dezafia menina sira atu iha komportamentu nabilan,  no iha festa Madre Mazzarello nian iha fulan Maiu, sira ne’ebé hatudu komportamentu di’ak sei hetan apresiasaun.