Laga – Iha santu sira nia moris Maromak hatudu nia oin mai ita. Nune’e  komunidade Orfanatu Beata Laura Vicuña Laga, ne’ebé beata ida ne’e sai ninia padrueira selebra festa ida ne’e; hahu ho inan-aman orfaun sira nian iha loron 19- Sabadu iha komunidade. Inan –aman sira ne’ebé prezente haree film Laura nian. Hafoin Ir. Ermelinda Silva ko’alia ho inan-aman sira kona-ba regulamentu asrama nian.

Iha tuku 11:00 Pe. Aquiles Soares, SDB mai selebra Eukaristia. Iha misa Padre hateten katak; Laura hadomi liu Maromak tan ne’e nia preukupa mos ba ema seluk nia moris. Nia oferese nia-an atu nia inan bele hetan salvasaun.

Depoisde misa, han hamutuk no atraksi husi labarik orfaun sira ba inan-aman hafaoin fahe malu.

Ohin loron 22 Janeiru mak  komemora loron ne’ebe Laura ba lalehan. Nune’e ohin komunidade orfanatu selebra Eukaristia hamutuk ho estudante sira husi ensinu báziku Katóliku Don Bosco Laga husi I – III siklu, ensinu báziku públiku soba-Laga no ensinu sekundáriu Don Bosco Laga, hamutuk ho edukador/a sira no mos ho sarani balun.

Eukaristia hahu tuku 8:00 dader iha parokia no selebra husi Pe. Aquiles Soares, SDB no Pe. Benigno Ornai Neto, SDB. Iha omilia amu selebrante Pe. Aquiles hateten katak; Laura Vicuña, maske idade sei ki’ik maibé nia preukupa ho ninia moris spiritual. Ba nia, Maromak mak importante liu iha ninia moris. Tan ne’e maske idade sei kiik nia iha projetu boot liu mak Santidade. Ba nia, Maromak prezente iha momentu hotu; iha rekreiu, iha estuda no iha serbisu, tan ne’e ninia knar loron-loron nian hala’o ho domin boot. Amu selebrante husu ba jovens sira atu aprende husi Laura Vicuña, hadomi knar loron-loron nian nu’udar estudante ho domin boot. Alem de ida ne’e, husu mos ba edukador/a sira atu tranzmite lisaun iha prosesu aprendizajen ho domin boot.

Atu festa ida ne’e sai kompletu liutan, mak depoisde misa iha tempu rekreiu eskola nian, komunidade oferese merenda ba estudante sira. Estudante sira hamutuk kuaze nain 700. Estudante sira hotu haksolok liu ho festa ida ne’e. Festa ida ne’e bele realiza tanba iha kolaborasaun entre komunidade SDB no FMA  sira.

(Aice Felipe Gama)