Papa Francisco nia lia-menon molok Angelus-Festa Batizmu Na’i nian (13-1-19)

Maun no biin-alin sira, bondia!

Ohin, iha Tempu litúrjiku Natál nia rohan, ita selebra festa Batizmu Na’i nian. Liturjia bolu ita atu koñese didi’ak Jezús ne’ebé, foin daudaun ita selebra ninia moris; no tanba ne’e Evanjellu (kf Lc 3,15-16.21-22) ilustra elementu importante rua: Jezús nia relasionamentu ho ema sira no Jezús nia relasionamentu ho Aman.

Iha narrasaun batizmu nian, João Batista fó iha bee sira Jordão nian, ita haree uluknanai povu nia papél. Jezús iha povu nia leet, Nia la’ós de’it iha kotuk, maibé nia komponente esensiál ida eventu nian. Uluknanai nia “tama” iha ema lubun-boot nia klaran, nia sai ida de’it ba sira hodi assume tomak kondisaun umana, partilla buat hotu, menus salan. Iha ninia santidade divina, nakonu ho grasa no mizerikórdia, Maromak nia Oan-Mane halo an ba isin atu bele lori iha nia no kasu mundu nia salan: foti ita-nia  mizéria sira, ita-nia kondisaun umana. Nune’e ida ohin nian mós mak epifania ida, tanba hodi bá Joã atu sarani nia, iha ema penitente husi ninia povu sira nia leet, Jezús manifesta lójika no sentidu ninia misuan nian.

Hodi sai ida de’it ho povu ne’ebé husu ba João, Batizmu konversaun nian, Jezús partilla mós hakaran kle’an renovasaun interiór nian. No Espíritu Santu ne’ebé tun iha nia leten «iha forma isin nian, hanesan manu-falur ida» (v. 22) mak sinál katak ho Jezús hahú mundu foun ida, “kriasuan foun” ida iha-ne’ebé sira hotu ne’ebé simu Kristu iha sira-nia moris hola parte iha kriasuan ne’e. Mai ita ida-idak mós, ne’ebé moris hikas ho Kristu iha Batizmu, Aman dirije liafuan mai ita: «Ó mak ha’u-nia Oan, ha’u-nia doben: iha ó ha’u tau ha’u-nia ksolok» (v. 22). Aman nia domin ida-ne’e, ne’ebé ita hotu simu iha loron ita-nia Batizmu nian, mak ahi lolon ida halakan iha ita-nia fuan, no husu atu halakan nafatin liuhusi orasaun no karidade.

Elementu daruak evanjelista Lucas subliña mak, depoizde tama iha povu no iha bee jordão nia laran, Jezús tama iha orasaun, katak iha komuñaun ho Aman. Batizmu mak inísiu vida públika Jezús nian, nia misaun iha mundu nu’udar Aman nia manu-ain atu manifesta ninia laran-di’ak no ninia domin ba ema sira. Misaun ida-ne’e kumpre iha uniaun konstante no perfeita ho Aman no Espíritu Santu. Kreda nia misaun no ita ida-idak nian mós, atu sai fiél no fó fuan barak, simu bolun atu hatama nia an iha Jezús nia moris. Ne’e katak atu halo sai moris nafatin liuhusi orasaun, evanjelizasaun no apostoladu, atu sai sasin sarani id ane’ebé bele hare momoos la’ós tuir projetu umanu, maibé tuir Maromak nia planu no estilu.

Maun no biin-alin sira, festa Batizmu nian mak okaziaun propísia atu hafoun ho gratidaun no konviksaun promesa sira ita-nia Batizmu nian, hodi haka’as an atu moris loroloron iha koerénsia. importante tebes mós, hanesan ha’u dehan ona ba imi iha momentu oioin, hatene data ita-nia loron Batizmu nian. Ha’u bele husu: “Sé husi imi mak hatene nia Batizmu nia data?”. Konserteza, la’ós hotu. Se imi ruma la hatene, fila fali ba uma, husu ba inan-aman rasik, avó sira, tiu sira, padriñu sira, belun sira família nian… Husu bá: “Iha sá loron mak sarani ha’u?”. No hafoin labele haluha: atu sai data ida ne’ebé rai iha fuan atu halo festa tinan-tinan..

Jezús, ne’ebé salva ita la’ós tanba ita-nia méritu sira maibé atu atua Aman ni alaran-di’ak rohan-laek, halo ita sai laran-sadia ba ema hotu. Virjen Maria, Inan Mizerikórdia nian, sai ita-nia matadalan no ita-nia modelu.