Dili – Oras ne’e Ita lao hela ho Amu-Papa Francisco Ensiklika “Gaudete et Esxultate”, Estreia Reitor Mor ne’ebé ho nia titulu “Santidade ba o’ mos” no ita nia progamasaun Inspetoria nian ne’ebé husu ita atu haburas ita nia  Santidade liu husi Santu/a sira nia paixaun ba Maromak no ba Maromak nia povu. Nune’e iha loron 9-10 Janeiro  Novisa II ano sira aprezenta ba Novisa I ano sira no komunidade kona ba Santu no Santa sira ne’ebé sira hili no haklean ona ho tempu naruk. Liu husi  buka santo/a ne’ebé sira nia moris, hodi le’e no haklean , halo intervista ho Madre sira ne’ebé hatene liu kona ba Santo/a sira no buka mos iha internet. Sira prepara no sei aprezenta ho powerpoint.  Ho prosesu hanesan: hahu ho orasaun, hato’o razaun tansa sira hili Santu/a ne’e, Santo/a sira nia Biografia, Santo/a sira nia dalan Santidade, mensagen ne’ebé sira  foti atu moris  tuir.

Ne’emak santu/a sira ne’ebé Novisa sira hili:

Nov. Sidalia hili Santa Faustina Kolwaski. Husi Polandia . Sta. Faustina  mai husi familia simples . Tan ne’e wainhira nia boot ituan nia hahu servisu, atu ajuda ekonomia familia nian. Nia sente Maromak nia bolun no hatan ho ksolok maski nia tenke hasoru difikuldade oi-oin.  Iha nia knar kiik sira nia halo ho diak no ksolok. Jezúsmosu ba nia no husu nia atu ba hela iha konventu iha Warsawa. Nia halo tuir. Iha ne’eba nia hetan konventu ida ne’ebé simu nia. Wainhira Superiora lori nia ba Kapela, iha ne’eba nia rona Jezús dehan ba nia ida ne’emak o nia fatin.Jezús mosu bebeik ba nia hodi hatudu “Nia sorin kanek ne’ebé suli be no ran”, hodi husu nia reza ba Klamar sira iha Prugatori.  Nia mak ema ne’ebé habelar Devosaun ba Jezús Mizerikordiozu. Buat ne’ebé hau gosta husi Santa ne’e mak; nia domin boot ba Jezús Miserikordiozu  no maski hasoru difikuldade no terus oi-oin no fiel nafatin iha moris orasaun.

Nov. Ingracia  hili Santo Agustinho Hippo tamba ba nia uluk nanain Nia gosta Sto. Agustinho  nia moris ne’ebé sai modelu ba mundu ohin loron. Hare fali ba Sinodu Bispo sira nian ne’ebé koalia kona ba Foin sa’e sira, nia sente Sto. Agustinho agustinho nia moris relevante tebes fainsae sira ohin nian. nune’e halo nia iha hakarak boot atu hatene diak liutan kona ba Santo ne’e atu fahe fali ba labarik no foin sae sira ne’ebé nia hasoru iha  nia apostoladu. Tamba foin sae ohin loron  riku liu ho buat mundu nian maibe kiak ba Maromak. Sto. Agustinho  dehan; “Hau  tarde liu hadomi Ita Nai, hau tarde liu hadomi Ita.” Tan ne’e atu dehan Maromak nafatin hadomi ita maibe dala barak ita hanesan Santo ida ne’e halai dook husi Maromak no buka prazer iha buat seluk no halo ita la sente Maromak Nia domin. Maski nune’e Maromak hakarak nafatin ita fila ba Nia, Nia la hare ba ita nia sala, Nia hare deit ba ita nia hakarak atu fila fali ba Nia. Seidauk tarde ba ita atu fila fali ba Maromak, Maromak hein ita ho Nia domin ne’ebé boot tebes. Mai ita fila ba Maromak atu bele hetan Ksolok los nian. dehan Ingracia.

Nov. Domingas hato’o kona ba Santa Monica, Sto. Agustinho nia mama.Santa ne’e nia moris dada liu irman ne’e nia atensaun tamba Monica mak feto ida ne’e forte iha orasaun, fiel tebes ba nia vokasaun nu’udar inan iha familia, nia iha laran maus no domin boot ba ida ne’ebé nia hadomi. Basa’ ho nia orasaun no matan ben ikus mai nia lori niaoan (Sto. Agustinho ) fila  ba Maromak.  Agustinho konverte husi nia moris a’at sai sarani diak ida, sai mos Bispo,ikus mai sai Santo no doutor da Igreja.

Tuir mai Teresa nia reflesaun kona ba Santo ne’ebé nia hili. Nia hili St. Francisco Assisi. Francisco mai husi familia riku, maibe tan deit Jezús nia husik buat hotu atu tuir Kristu no lori ema barak ba Kristu. Jezús mosu ba nia liu husi ema kiak sira no leprozu sira.Jezús husu ba Francisco atu hadia nia kreda ne’ebé besik monu. No Santo ne’e halo tuir. Nia hare ba santo ne’e nia moris no virtude sira  hanesan haraik-an, simples, laran mos, atenbrani atu husik buat hotu, dame nain no obedente. Iha difikuldae sira nia nafatin kontempla  Jezús iha Kruz no nia hadomi liu kiak sira no nia dehan nia hare Kristu iha ema sira hanesan ne’e. Nia mos mak Santo ida ne’ebé hadomi liu Kriasaun sira, Estima sira no bolu buat hotu nia maun alin, to’o “mate” mos nia bolu “bin mate”. Nov. Teresa dehan tan; ba St. Francisco, prezensa anima l ida nian maski kiik liu tulun nia atu hateke ba oin maski hasoru difikuldade.  Ho atividade ne’e halo Nov. Teresa sente haksolok  no agradese tebes tamba ho atividade ne’e halo nia konhese liu tan Santo ne’e no nia bele aprende liutan kona ba programa sira iha  Komputador hanesan Power point  oinsa tau imajen sira no seluk tan.

(Noemia de Deus)