Fiu kondutór ba dokumentu mak epizódiu dixípulu Emaus nian, ne’ebé evanjelista Lucas haktuir. Dokumentu ne’e mak dokumentu komplementár ba Instrumentum laboris Sínodu nian no fahe ba parte tolu: 1) Nia la’o ho sira; 2) sira nia matan nakloke; 3) Sira hamri’ik bá lalais. Dokumentu Finál fahe ba parte tolu, kapítulu 12 no parágrafu 167.

“NIA LA’O HO SIRA “

Uluknanai, Dokumentu Finál Sínodu nian hateke ba kontestu ne’ebé joven sira moris bá, hodi destaka pontu sira forsa nian no dezafiu sira. Buat hotu hahú husi rona iha empatia, ne’ebé ho haraik-an, pasiénsia no disponibilidade, permiti atu halo diálogu tebes duni ho joven sira, hodi evita “resposta prepara antes no reseita pronta”. Defaktu, joven sira, hakarak ema “rona sira, rekoñese sira, akompaña sira” no hakarak atu sira nia lian hetan “konsiderasaun nu’udar interesante no útil iha kampu sosiál no ekleziál”. Sínodu rekoñese Igreja ladún iha atitude ida-ne’e: dalabarak amlulik no bispu sira, nakonu ho kompromisu barak, luta atu hetan tempu ba servisu raronak nian. Husi ne’e mai nesesidade atu prepara ho modu adekuadu leigu sira, mane no feto, ho kapasidade atu akompaña jerasaun joven sira. Hasoru fenómenu globalizasaun no sekularizasaun, joven sira bá iha diresaun redeskoberta Maromak no espiritualidade nian no ida-ne’e tenke sai estímulu ida ba Igreja, atu rekupera importánsia dinamizmu fiar nian.

Eskola no no parókia

Igreja nia resposta seluk ba joven sira nia kestaun mai husi setór edukasionál: eskola sira, universidade sira, fakuldade sira, oratóriu sira, permiti formasaun integrál joven sira-nian, tempu hanesan, oferese testemuñu evanjéliku promosaun umana nian.

Iha mundu ida iha-ne’ebé buat hotu konektadu – família, serbisu, teknolojia, defeza embriaun no migrante nian – bispu sira define nu’udar insubstituível (labele troka) papél ne’ebé eskola no universidade dezempeña, iha-ne’ebé joven sira pasa tempu barak. Instituisaun edukasionál katólika sira, iha partikulár, simu bolun atu enfrenta relasaun entre fiar no demanda sira mundu kontemporáneu nian, perspetiva antropolójika diferente, dezafiu tékniku-sientífiku sira, mudansa iha kostume sosiál sira no kompromisu ho justisa. Parókia mós iha ninia papél: “Igreja iha territóriu”; presiza hanoin filafali ninia vokasaun missionária, basá dalabarak rezulta ladún signifikativa no ladún dinámika, espesialmente iha área katekeze nian.

Migrante sira, paradigma ida ita-nia tempu nian

Dokumentu sinodál foka tema migrante sira-nian, “paradigma ita-nia tempu nian”,  nu’udar fenómenu estruturál ida, no la’ós emerjénsia tranzitória ida. Migrante barak mak joven ka menoridade lahó akompañadór/a, halai husi funu, violénsia, persegisaun polítika ka relijioza, dezastre naturál sira, pobreza no ikusmai sai vítima tráfiku nian, droga nian, abuzu psikolójiku no fíziku nian. Igreja nia preokupasaun liuhotu mak sira – Sínodu hateten – iha ótika promosaun umana auténtika ne’ebé liuhusi simu refujiadu sira, no sai pontu referénsia ba joven barak ne’ebé haketak an husi sira-nia família orijen nian. La’ós de’it ida-ne’e: migrante sira – Dokumentu fó hanoin – mak oportunidade ida mós atu hariku no bele revitaliza komunidade no sosiedade sira ne’ebé sira to’o bá tanba sira. Nune’e, verbu sira Sínodu nian ne’ebé Papa Francisco sujere atu manán deskonfiansa no ta’uk,  hanesan “simu, proteje, promove, integra” nalian. Bispu sira mós husu empeñu liután atu garante ba sira ne’ebé lakohi migra, direitu atu hela iha sira-nia rain rasik. Sínodu nia atensaun mós diriji ba igreja sira ne’ebé hetan ameasa ba sira-nia ezisténsia, ameasa migrasaun forsada no persegisaun sira ne’ebé ninia sarani sira sofre.

Kompromisu firme kontra tipu hotu abuzu nian. Dehan lia-loos no husu perdaun

Reflesaun kona-ba “tipu oioin abuzu nian” (podér, ekonómiku, konxiénsia, seksuál) ne’ebé komete husi bispu balun, amlulik, relijiozu no leigu sira: iha vítima sira – ita lee iha testu – sira provoka sofrimentu ne’ebé “bele dura moris tomak no iha-ne’ebé laiha arrependimentu ida bele tau ai-moruk”.

Apelu firme husi Sínodu ba “kompromisu firme ho adosaun medida rigoroza prevensaun nian ne’ebé impede repete hahalok ne’e, hahú husi selesaun no formasaun ba sira ne’ebé sei entrega tarefa sira responsabilidade nian no edukativa”. Nune’e, presiza fokit sai forma sira – hanesan korrupsaun no klerikalizmu – abut ba tipu abuzu sira, hodi kontra mós falta responsabilidade no transparénsia iha modalidade jere kazu sira ne’e. Tempu hanesan, Sínodu agradese ba ema hotu ne’ebé “iha korajen atu denunsia buat aat ne’ebé sira sofre”, tanba tulun Igreja atu “iha konxiénsia kona-ba saida mak akontese no nesesidade atu atua ho desizaun”. “Mizerikórida, defaktu, ezije justisa”. Maibé labele haluha leigu, amlulik, ema konsagrada no bispu lubuk ida ne’ebé loroloron dedika an, ho onestidade, ba serví joven sira, ne’ebé bele oferese duni “ajuda ida folin liu” ba “reforma dimensaun epokál” iha área ida-ne’e.

Família “Igreja Doméstika”

Tema seluk hetan iha Dokumentu ko’alia kona-ba família, pontu referénsia prinsipál ba joven sira, komunidade fiar dahuluk, “Igreja doméstika”: Sínodu bolu atensaun, ho modu partikulár, ba avó-feto sira nia papél iha edukasaun relijioza no tranzmisaun fiar nian, no alerta kona-ba  enfrakesimentu figura paterna nian no kona-ba adultu sira ne’ebé assume estilu moris “joven nian”. Aleinde família, ba joven sira, amizade ho kolega sira importante liu, basá permiti partilla fiar nian no tulun resíproku iha testemuñu.

Promosaun justisa kontra “kultura desperdísiu nian”

Sínodu konsentra mós iha forma sira vulnerabilidade nian ne’ebé joven sira moris iha setór oioin” iha serbisu, iha-ne’ebé dezempregu halo jerasaun joven kiak, ameasa sira-nia kapasidade mehi nian; persegisaun sira to’o mate; eskluzaun sosiál tan motivu relijiozu, étniku ka ekonómiku sira; defisiénsia sira. Hasoru “kultura deskarte” nian, Igreja lansa apelu ida ba konversaun no solidariedade, hodi sai alternativa konkreta ida ba situasaun sira difikuldade nian. Husi parte seluk, joven sira nia komprometimentu konsege espresa ho orijinalidade no espesifisidade iha área oioin: porezemplu, voluntariadu, atensaun ba kestaun ekolójika, kompromisu iha polítika ho konstrusaun di’ak komún, promosaun justisa nian, no joven sira husu ba Igreja “kompromisu firme no koerente”.

Arte, múzika no desportu, “rekursu pastorál sira”

Mundu desportu no múzika nian mós oferese ba joven sira possibilidade atu espresa an ho forma di’ak liu: iha kazu dahuluk, Igreja konvida atu keta tau sees potensialidade edukasionál, formativa no inkluziva atividade desportiva nian; husi parte seluk, iha kazu múzika nian, Sínodu ko’alia kona-ba múzika nu’udar “rekursu pastorál” ne’ebé interpela mós renovasaun litúrjika, basá joven sira hakarak “liturjia ida moris”, auténtika, haksolok, momentu enkontru nian ho Maromak no komunidade.

Joven sira apresia selebrasaun auténtika sira iha-ne’ebé “beleza sinál sira-nian, kuidadu pregasaun nian no envolvimentu komunidade nian koalia tebes duni kona-ba Maromak”:  tanba ne’e, presiza tulun atu deskobre valór adorasaun eukarístika nian no komprende katak “liturjia la’ós de’it espresaun ida liturjia rasik nain, maibé Kristu no Igreja nia asaun”.

Jerasaun joven sira, aleinde ne’e, hakarak sai protagonista iha vida ekleziál, hodi uza sira-nia talentu no assume responsabilidade sira, sujeitu ativu asaun pastorál nian, sira mak prezente Igreja nian, tenke enkoraja sira atu partisipa iha vida ekleziál, no la impede ho autoritarizmu.  Igreja ida ho kapasidade atu dialoga ho forma ne’ebé ladún paternalista no sinsera liután, halo joven sira sai ativu liu iha evanjelizasaun ba sira nia joven maluk, hodi ezerse apostoladu loloos ida, ne’ebé tenke hetan apoiu no integra iha komunidade nia vida.

“SIRA-NIA MATAN NAKLOKE”

Maromak ko’alia ba Igreja no ba mundu liuhusi joven sira, nu’udar “fatin teolójiku” ida iha ne’ebé Na’i prezente bá. Juventude mak maklorik ka portadora laran lahakmatek santu ida ne’ebé halo sai dinámika, nune’e juventude bele iha “bibi-atan sira nia oin” no tenke simu sira, respeita no akompaña, Sínodu hateten. Ho juventude, Igreja bele hafoun an, hodi hasai ninia “naha no neineik”.  Tan ne’e mak Sínodu fó hanoin kona-ba modelu “Jezús joven iha joven sira nia leet” no kona-ba santu sira nia sasin, no entre sira iha santu joven barak, profeta sira mudansa nian.

Misaun no vokasaun

“Bússola segura’ seluk ba juventude mak misaun, don an rasik nian ne’ebé lori ba ksolok loloos no kleur: Jezús, defaktu, la hasai liberdade, maibé liberta liberdade. Liberdade loos posivel de’it iha relasaun ho lia-loos no karidade. Misaun iha ligasaun íntima ho vokasaun: vida ida-idak mak vokasaun iha relasaun ho Maromak, la’ós rezultadu “akazu” ida nian ka soin privadu ida atu jere mesmesak – Sínodu afirma – no vokasaun batizmál ida-idak mak bolun ida santidade nian ba ema hotu. Tanba ne’e, ema ida-idak tenke moris didi’ak ninia vokasaun espesífika rasik iha área ida-idak: profisaun, família, vida konsagrada, ministériu ordenadu ka diakonadu permanente, ne’ebé reprezenta “rekursu” ida atu dezenvolve plenamente.

Akompañamentu

Akompaña mak misaun ida ba Igreja atu realiza iha nivel pesoál no grupu: iha mundu ida “karakteriza ho pluralizmu ida evidente ba beibeik no ho disponibilidade ida hilin sira-nian ne’ebé luan ba beibeik”, buka hamutuk ho joven sira dalan ida ne’ebé orienta ba hilin definitivu sira mak servisu nesesáriu ida. Destinatáriu mak joven sira hotu: seminarista sira, amlulik ka relijiozu sira iha formasaun, noivu sira no kaben-na’in foun sira. Komunidade ekleziál mak fatin ida relasaun sira nian no kontestu iha-ne’ebé Jezús rasik mak, iha selebrasaun eukarístika, kona sira, hanorin sira no kura sira. Dokumentu Finál enfatiza importánsia Sakramentu sira Rekonsiliasaun nian iha vida fiar nian no enkoraja aman-inan sira, profesór/a sira, lideransa sira, animadór/a sira, amlulik sira no edukadór/a sira atu tulun joven sira, liuhusi Doutrina Sosiál Igreja nian, no assume responsabilidade sira iha ámbitu profisionál no sósiu-polítiku. Dezafiu iha sosiedade sira ne’ebé sai interkulturál no plurirelijioza ba beibeik, mak hatudu, katak diversidade mak oportunidade ida ba komuñaun fraterna no ba hariku malu.

Lae ba moralizmu no induljénsia falsa sira, sín ba korresaun fraterna

Sínodu promove akompañamentu integrál ho sentru iha orasaun no iha serbisu interiór ne’ebé valoriza mós kontribuisaun husi psikolojia no psikoterapia, ne’ebé nakloke ba tranxendénsia. “Selibatu ba Reinu”,  – Sínodu fó hanoin – presiza komprende nu’udar “don ida ne’ebé tenke rekoñese no verifika iha liberdade, ksolok, gratuidade no umildade”, molok hilin definitivu. Presiza investe no fó apoiu ba akompañadór/a sira kualidade nian: ema ekilibrada, rona-na’in, ema fiar nian, orasaun, ne’ebé hasoru sira-nia frakeza no frajilidade sira, no sai ema akolledór/a “lahó moralizmu no induljénsia falsa sira”. Sira tenke sai ema ne’ebé hatene  korriji fraternalmente, dook husi komportamentu possesivu no manipuladór. “Respeitu profundu ida-ne’e – ita lee iha testu – mak garantia di’ak liu kontra risku sira tipu hotu plájiu no abuzu nian”.

Arte dixerne nian

“Igreja mak ambiente atu dixerne no konxiénsia mak – Padre sinodál sira hakerek – fatin iha-ne’ebé ku’u frutu enkontru no komuñaun nian ho Kristu”: dixernimentu, liuhusi “konfrontu regulár ida ho diretór espirituál”, mak servisu ida sinseru konxiénsia nian, no bele haree nu’udar forma auténtika ida orasaun nian no “rekere korajen atu empeña an iha luta espirituál”. Fatin atu halo prova kona-ba desizaun sira ne’ebé foti ona mak vida fraterna no servisu ba ema kiak sira. Defaktu, joven sira sensivel ba dimensaun diakonia.

“SIRA HAMRI’IK NO BÁ LALAIS KEDAS”

Maria Madalena, dixípula misionária dahuluk, ne’ebé hetan kura husi kanek sira, sasin Moris-Hi’as nian, mak íkone Igreja joven nian. Joven sira nia difikuldade no frajilidade sira, “tulun ita atu sai di’ak liután, sira-nia lia-husun sira sadik ita, sira-nia krítika nu’udar nesesária, tanba dalabarak liuhusi sira, Na’i nia lian husu mai ita, konversaun no renovasaun”. Joven hotu, maski sira ne’ebé ho vizaun seluk moris nian, laiha eskluzu, horik iha Maromak nia fuan. Padre sinodál sira realsa dinamizmu konstrutivu sinodalidade nian, katak, la’o hamutuk: Asembleia nia finál no Dokumentu finál mak etapa ida de’it tanba kondisaun konkreta no nesesidade urjente sira diferente entre país no kontinente sira. Nune’e, konvite ba Konferénsia Episkopál sira no ba Igreja partikulár sira atu kontinua prosesu dixernimentu ho objetivu atu elabora solusaun pastorál espesífika sira.

Sinodalidade, estilu misionáriu

“Sinodál” mak estilu ida ba misaun ne’ebé ezorta atu hakat husi “ha’u” ba “ita” no atu konsidera multiplisidade oin nian, sensibilidade nian, orijen kutirál diferente. Iha orizonte ida-ne’e mak presiza valoriza karizma sira ne’ebé Espíritu fó ba hotu-hotu, hodi evita klerikalizmu ne’ebé esklui prosesu barak desizaun nian no klerikalizasaun leigu sira-nian, ne’ebé hapara laran-manas misionáriu.

Presiza hala’o autoridade iha perspetiva servisu nian. Sinodál mós nu’udar abordajen ba diálogu inter-relijiozu no ekuméniku ne’ebé tulun atu iha koñesimentu resíproku no supera prekonseitu no estereótipu sira, no renovasaun vida komunitária no parokiál, atu habadak distánsia joven-igreja no hatudu ligasaun metin entre fiar no esperiénsia konkreta moris nian. Durante Sínodu, formaliza tiha mós pedidu atu, iha nivel Konferénsia Episkopál, institui “Diretóriu pastorál juventude nian iha xave vokasionál”, ne’ebé bele tulun responsavel diosezanu sira no ajente lokál sira atu kualifika di’ak liután sira-nia edukasaun no asaun ho no ba joven sira”, hodi kontribui atu supera fragmentasaun iha pastorál Igreja nian. Iha Sínodu tenik hikas importánsia JMJ (Jornada Mundial Juventude), nune’e mós sentru juventude no oratóriu sira, hodi kualifika didi’ak.

Dezafiu dijitál

Iha dezafiu urjente ruma ne’ebé Igreja simu bolun atu enfrenta. Dokumentu Finál Sínodu nian aborda misaun iha ambiente dijitál: parte integrante realidade loroloron joven sira-nian, “prasa” iha-ne’ebé sira pasa tempu barak no hasoru malu fasilmente, fatin ida ne’ebé labele renunsia atu to’o no envolve joven sira iha atividade pastorál sira mós, maski web aprezenta naroman no nakukun sira.

Se husi parte ida permiti asesu ba informasaun, ativa partisipasaun sósiu-polítika no sidadania ativa, husi parte seluk aprezenta nia sorin nakukun – hanaran dark web – iha-ne’ebé hetan solidaun, manipulasaun, esplorasaun, violénsia, cyberbullying, pornografia. Nune’e, Sínodu konvida atu horik iha mundu dijitál, hodi promove ninia potensiál komunikativu  ho finalidade anúnsiu kristaun no “hakonu” ninia kultura no dinámika sira ho Evanjellu.

Sínodu hakarak atu kria Eskritóriu sira no organizmu ba kultura no evanjelizasaun dijitál ne’ebé, aleinde “favorese troka no diseminasaun prátika di’ak sira, bele jere sistema sertifikasaun site katóliku sira, atu hapara diseminasaun notísia falsa sira (fake news) kona-ba Igreja”, emblema kultura ida ne’ebé “lakon sentidu lia-loos nian”, hodi enkoraja promosaun polítika no instrumentu sira ba protesaun menoridade iha web”.

Isin, seksualidade no kariñu

Dokumentu enfoka tema isin nian, afetividade nian, seksualidade nian: hasoru dezenvolvimentu sientífiku ne’ebé hamosu kestaun étika,  fenómenu sira hanesan pornografia dijitál, turizmu seksuál, seksu livre, ezibisionizmu online, Sínodu fó hanoin ba família no komunidade sarani sira kona-ba importánsia atu halo joven sira deskobre katak seksualidade mak don ida. Dalabarak ema haree morál seksuál Igreja nian nu’udar “espasu ida juízu no kondenasaun nian”, enkuantu joven sira buka “liafuan klaru, umana no empátika ida” no “espresa hakaran esplísitu konfrontu nian kona-ba kestaun sira liga ho diferensa entre identidade maskulina no feminina, resiprosidade entre mane no feto sira, omoseksualidade”.

Bispu sira rekoñese Igreja nia difikuldade atu tranzmiti iha kontestu kulturál atuál” beleza vizaun kristán korporeidade no seksualidade nian”: urjente  atu buka “modalidade sira adekuada sira, ne’ebé tradús konkretamente iha elaborasaun dalan formativa sira ne’ebé foun”. “Presiza propoin ba joven sira antropolojia ida afetividade no seksualidade nian ho kapasidade atu fó valór justu ba kastidade” ba ema nia kreximentu, “iha estadu hotu moris nian”. Iha sentidu ida-ne’e, husu atu tau atensaun ba ajente pastorál sira nia formasaun ne’ebé ema bele fiar no tasak husi pontudevista afetivu-seksuál”.

Aleinde ne’e, Sínodu konstata “kestaun sira liga ho isin, afetividade no seksualidade ne’ebé presiza elaborasaun antropolójika, teolójika no pastorál ida ne’ebé kle’an liután, atu realiza iha modalidade no nivel sira ne’ebé konveniente liután, husi lokál ba universál. Entre sira-ne’e emerje kestaun sira liga ho diferensa no armonia entre identidade maskulina no feminina no inklinasaun seksuál sira”.

“Maromak hadomi ema ida-idak no nune’e mak Igreja halo, hodi renova ninia kompromisu kontra diskriminasaun hotu no violénsia ho baze seksuál”. Ho forma hanesan – Dokumentu kontinua – Sínodu afirma hikas relevánsia antropolójika diferensa no resiprocidade mane-feto nu’udar determinante no konsidera redutivu define ema nia identidade bazeia de’it ba ninia orientasaun seksuál”.

Tempu hanesan, rekomenda atu “favorese dalan sira akompañamentu iha fiar, ne’ebé iha ona iha komunidade sarani sira”, ba “ema omoseksuál sira”. Iha dalan sira-ne’e, ema simu tulun atu lee istória rasik; atu adere livremente no responsavelmente ba bolun batizmál rasik; atu rekoñese hakaran atu hola parte no kontribui ba komunidade nia moris; atu dixerne forma di’ak liu atu bele realiza nia. Ho maneira ne’e, tulun joven ida-idak, hosi la esklui ema ida, atu integra ba beibeik dimensaun seksuál personalidade rasik nian, hodi buras iha kualidade relasaun sira no hodi bá to’o don an rasik nian”.

Akompañamentu vokasionál

Entre dezafiu sira ne’ebé Sínodu hatudu, ita hetan mós kestaun ekonómika: Padre sira nia konvite mak investe tempu no rekursu iha joven sira ho proposta atu oferese ba sira períodu ida ba maturasaun vida sarani adulta, ne’ebé “tenke prevé separasaun naruk ida husi ambiente no relasaun baibain sira”.

Aleinde husu atu halo akompañamentu molok no depoizde kazamentu, Sínodu enkoraja kriasaun ekipe edukativa sira ne’ebé inklui figura feto sira no kazál sarani sira, ba seminarista no konsagradu sira nia formasaun, ho objetivu atu supera tendénsia ba klerikalizmu. Tenke fó atensaun espesiál ba kandidatu sira saserdósiu/amlulik nian, ne’ebé dalaruma, “laiha koñesimentu adekuadu no releitura kle’an ba istória pesoál rasik”: “instabilidade relasionál no afetiva, no falta abut ekleziál mak sinál perigozu sira. Hodi la tau atensaun ba normativa ekleziál kona-ba ne’e – Padre sinodál sira hakerek – konstitui komportamentu lahó responsabilidade, ne’ebé bele iha konsekuénsia grave liu ba komunidade sarani sira”.

Bolun ba santidade

“Diversidade vokasaun sira nian – Dokumentu Finál Sínodu Joven sira nian konklui – integra hotu iha bolun ida mesak no universál ba santidade. Infelizmente  mundu laran nakali ho abuzu sira ne’ebé ema ruma Igreja nian halo, duké hetan forsa husi membru sira nia santidade”. Tanba ne’e Igreja simu bolun ba “mudansa ida perspetiva nian”: liuhusi joven barak nia santidade ne’ebé dispostu atu renunsia moris rasik iha persegisaun nia laran nune’e kontinua fiél ba Evanjellu, Igreja bele hafoun ninia laran-manas espirituál no ninia kbiit apostóliku.

(FMA TIN TATOLI – Set-Dez 2018)