Infánsia Misionária Baucau kumprimenta D. Basílio “Boas Festas Do Santo Natal”

 

Baucau – Labarik na’in 50 resin grupu Infánsia Misionária ohin halibur hamutuk iha salaun parokiál atu kumprimenta D. Basílio do Nascimento, bispu dioseze Baucau nian.

Sira hato’o sira nia teatru simples ida ne’ebé konta kona-ba anju sira ne’ebé prepara an iha lalehan atu tuun bá rai hodi serví Maromak nia Oan ne’ebé atu moris. Anju ida-idak husi boot to’o ki’ik hakarak oferese sira-nia prezente rasik, buat ne’ebé sira iha no hadomi liu ba Jezús.

 

Teatru ne’e sira prepara hamutuk ho Irmán Albina do Carmo no animadora na’in tolu Miranda, Anita no Juvéncia durante semana rua nia laran, liuliu ho modu intensivu  iha loron sira novena ba Santu Natál.

Amu-Bispu Basílio agradese labarik sira ba sira-nia teatru, gaba sira nia lian ne’ebé kanta di’ak. Nia dehan ba sira, katak oras-ne’e nia komprende tansá labarik sira kanta di’ak durante ensaiu ba knanauk Te Deum ho lia-portugés ne’ebé nia rasik treina, no hakfodak katak sira aprende lalais. Aleinde ne’e nia enkoraja sira atu kontinua haburas teatru tanba liuhusi teatru sira-ne’e sira bele hakle’an liután Jezús nia moris no ninia mensajen.

Marka prezensa iha festa Natál labarik sira nia inan no família sira, maun no biin-alin sira nune’e mós labarik seluk husi oratóriu.  Hotu tiha kumprimentus Natál nian, Amu-Bispu mós fahe ba sira prezente midar ruma, hafoin sira halo merenda hamutuk ho katekista, madre sira no família.