Dili – Iha loron Solenidade EPI FANIA DO SENHOR, 06 Janeiro iha komunidade São José  Novisiadu Komoro haksolok tebes simu Irman Novisa foun nain 4 (ha’at) ; Ir.Adelaide Almeida, Ir. Adelia Amaral, Ir. Agustinha Lopes no Ir. Silvia Lemos, ho Selebrasaun ne’ebe furak no preparada. Ho fiar sira hakarak buka nafatin Maromak Nia hakarak iha sira nia etapa foun ida ne’e, atu halo esperiensia klean liutan ho Maromak  ida ne’ebe bolu, hodi tuir karisma Dom Bosco no Madre Mazzarello nian. Sira mos tau laran metin ba  Jesus Nia lia fuan ne’ebe dehan “Keta Tauk, tama liu ba tasi laran no soe dai ba”.

Tempu novisisdu mak tempu tama liu tan atu besik no koñese liu tan Kristu iha esperiensia loro-loron nian iha komunidade hodi reflete, haklean no discerne nafatin Maromak Nia hakarak ba sira atu bele prepara-an sai hakail nain ema nian iha Nai Nia Kreda. Iha tinan hirak ne’e sira halo ona enkontru ho Kristu , haklean liu tan sira nia vokasaun  no komesa tiha ona moris tuir Dom Bosco no Madre Mazzarello sira nia espiritu iha vida komunitaria no apostolado. Oras ne’e dadaun sira hahu Vida Relijioza Filha de Maria Auxiliadora nian. Nudar Konstitusaun, sira haka’as-an loro-loron iha haluha-an, integrasaun servisu no orasaun, sira sei haklean esizensia sira, atu tuir Kristu iha Vokasaun Saleziana, hodi moris iha komunidade nudar bin-alin, ho esperiensia apostolika, sei loke –an ba sentidu misaun nian. Buka atu moris tuir identidade Filhas de Maria Auxiliadora no hametin liu tan iha Instituto ne’e, ho ksolok fo-an tomak ba maromak atu soi foin-sae sira nia klamar.

Iha leitura sira ne’ebe sira hili ba selebrasaun ne’e; I Leitura husi Profeta Isaias     ( Is. 42:1-7)ne’ebe dehan Maromak bolu no fo aten brani ba nia atu haklaken Nai Nia lia fuan, basa Maromak fihir nanis nia atu halo matan delek sira bele hare, atu hasai dadur sira husi kadeia no fo roman ba sira ne’ebe moris iha nakukun laran . Iha II Leitura ne’ebe  foti husi São Pedro nia surat daruak ( 2Ped 1:1-8,10) koalia kona ba ema hirak ne’ebe Nai bolu ba Nia rasik Nia Gloria sei husik buat ne’ebe mundo nian hodi hola parte ba Maromak nia moris. Iha Evanjellu ( Lc 5:1-7,9-11) Jesus fo korajem ba Nia eskolante sira atu tama klean liu tan ba tasi klaran hodi soe dai no foti sira sai hakail nain ema nian. Nune’e iha Me. Alma nia lia menon, Madre foti sitasaun balu husi leitura ne’ebe dehan iha segunda leitura, “Nia haraik mai ita promesa folin bo’ot liu, atu husi sira ne’e imi labele halo parte iha mundu ne’ebe sai dodok dadaun tamba hakarak a’at” Maromak hasai imi nain ha’at husi mundu atu tesi imi nia a’at sira ituan-ituan atu imi soi ba Maromak Nia Gloria. Iha Evanjellu, ita rona sira “hakfodak”  maibe sira husik Jesus gia sira atu tama liu tan ba tasi klaran, Jesus mos sei gia imi atu tama klean liu tan atu deskobre Nia iha moris lor-loron nian hodi hatan ba Nia bolu ho ksolok. Hafoin Madre Provinsial entrega sira nain ha’at ba Madre Maestra atu akompaña sira no tulun sira iha etapa foun ne’e. Selebrasaun hotu tiha irman sira hakat ba merenda hamutuk ne’ebe komunidade rua;  Komunidade Balide no Novisiado prepara tiha ona. Parabens ba Irman nain ha’at no komtinua nafatin ba oin iha Maromak Nia Grasa no Maria Auxilidora Nia gia.

(Noemia de Deus)