Papa Francisco nia mensajen Angelus ikus iha tinan 2018

Maun no biin-alin sira, bondia!

Ohin ita selebra festa Santa Família no liturjia konvida ita atu reflete kona-ba Maria, José no Jezús nia esperiénsia, ida de’it iha domin boot no anima husi konfiansa boot ba Maromak. Pasajen evanjéliku ohin nian (kf Lc 2,41-52) haktuir família Nazaré ia viajen ba Jerusalém, ba festa Páskua nian. Maibé, iha viajen fila nian, inan-aman sira nota katak oan tinan 12 laiha karovana. Depoizde loron buka tuir no iha laran-taridu laran, sira hetan nia iha templu, tur iha doutór sira nia leet, diskute namanas ho sira. Haree Oan nune’e, Maria no José «hakfodak» (v. 48) no Inan hatudu ninia korresaun hodi dehan: «Ó-nia Aman no ha’u, laran taridu, buka ó» (ibid.).

Admirasaun – sira «hakfodak» – no laran taridu – «ó-nia aman no ha’u, laran taridu» – mak elementu rua ne’ebé ha’u hakarak bolu imi-nia atensaun: hakfodak no laran-taridu.

Iha família Nazaré nian nunka nahas maravilla, maski iha momentu dramátiku hanesan Jezús ne’ebé lakon: ne’e mak kapasidade atu hakfodak iha Maromak nia Oan nia manifestasaun graduál. Maravilla hanesan afeta doutór sira templu nian, admira «ba ninia intelijénsia no ninia resposta sira» (v. 47). Maibé saida mak maravilla, katak sá hakfodak? Hakfodak no moris maravilla mak kontráriu ba haree buat hotu hanesan baibain, kontráriu ba interpreta realidade ne’ebé haleu ita no eventu sira istória nian tuir ita-nia kritériu sira de’it. No ema ida nne’ebé halo nune’e la hatene saida mak maravilla, saida mak hakfodak. Hakfodak katak loke an ba ema seluk, komprende ema seluk nia razaun sira: atitude ne’e importante atu kura relasaun komprometidu sira entre ema, no indispensavel mós atu kura kanek nakloke sira iha ámbitu familiár. Bainhira iha problema sira iha família, ita baibain de’it atu hanoin katak ita iha razaun no ita taka odamatan ba ema seluk. Iha kontráriu, ita tenke hanoin: “Sá loos buat di’ak ema ne’e iha?”, no admira ba buat “di’ak” ne’e. No ida-ne’e tulun unidade família nian. Se imi iha problema iha família, imi hanoin ba buat di’ak sira ne’ebé ema familiá ne’ebé imi iha problema ho nia, no admira ba buat ne’e. No ida-ne’e tulun ita kura kanek familiár sira.

Elementu daruak ne’ebé ha’u hakarak foti husi Evanjellu mak laran-taridu ne’ebé Maria ho José esperimenta bainhira sira la konsege hetan Jezús. Laran-taridu ida-ne’e manifesta sentralidade Jezús nian iha Santa Família. Virjen no ninia espozu simu Oan ne’e, tau matan ba Nia no haree nia sai boot iha otas, sabedouria no grasa iha sira-nia leet, maibé liuliu Nia sai boot iha sira-nia fuan; no neineik-neineik, aumenta sira-nia afetu no sira-nia komprensaun kona-ba NIa. Tanba ne’e mak família Nazaré ne’e santa: tanba Jezús mak iha sentru, ba Nia diriji Maria no José ninia atensaun no kuidadu hotu.

Laran-taridu ne’ebé sira koko iha loron tolu Jezús lakon, tenke sai mós ita-nia laran-taridu bainhira ita dook husi Nia, bainhira ita dook husi Jezús. Ita tenke koko laran-susar bainhira liu loron tolu ita haluha Jezús, la reza, la lee Evanjellu, la koko nesesidade ba Ninia prezensa no ninia amizade konsoladora. No dalabarak loron sir aliu iha-ne’ebé ha’u la hanoin hetan Jezús. Maibé ida-ne’e aat liu, aat liu duni. Ita tenke sente laran-taridu bainhira uat sira-ne’e akontese. Maria no José buka Nia no hetan Nia iha templu enkuantu Nia hanorin: ita mós, iha Maromak nia uma, liuliu, mak it abele hetan Mestre divinu no simu ninia mensajen salvasaun nian. Iha selebrasaun eukarístika ita halo esperiénsia moris Kristu nian; Nia ko’alia mai ita, oferese mai ita ninia Liafuan, leno ita, leno ita-nia dalan, haraik mai ita ninia futar Isin iha Eukaristia husi ne’ebé ita hetan kbiit atu enfrenta difikuldade sira loroloron nian.

No ohin ita fila ba uma ho liafuan rua ne’e: hakfodak no laran-taridu. Ha’u hatene iha maravilla, bainhira ha’’u haree ema seluk ninia buat di’ak sira, nune’e resolve problema sira família nian? Ha’u sente laran-taridu bainhira ha’u hadook an husi Jezús?

Ita harohan ba família hotu mundu nian, liuliu sira ne’ebé, tan motivu oioin, kuran dame no armonia. No ita konfia sir aba Santa Família Nazaré nia protesaun.