Papa Francisco iha Angelus 22-12-2013

 

Maun no biin-alin sira, bondia!

Iha domingu dahaat Adventu nian ne’e. Evanjellu haktuir mai ita faktu sira ne’ebé mosu molok Jezús nia moris, no evanjelista Mateus aprezenta nia husi pontudevista José nian, Virjen Maria nia espozu prometidu.

José no Maria moris iha Nazaré; seidauk hela hamutuk, tanba seidauk realiza matrimóniu. Iha tempu ne’e, Maria, simu tiha Anju nia lia-tatoli, sai isin-rua hodi Espíritu Santu nia kbiit.

Bainhira José nota kona-ba faktu ne’e, nia sai konfuzu. Evanjellu la esplika sá loos mak ninia hanoin sira, maibé dehan buat ne’ebé esensiál: nia buka halo Maromak nia vontade no prontu ba renúnsia radikál liu. Envezde defende an no hatudu ninia direitu sira, José hili solusaun ida ne’ebé ba nia reprezenta sakrifísiu boot ida. No Evanjellu hateten: «Tanba nia ema justu no lakohi hamoe Maria, hakotu atu husik nonook de’it» (Mt 1,19).

Fraze badak ne’e halo rezumu kona-ba drama interiór ida loos no tebes nian, se ita hanoin kona-ba domin ne’ebé José iha ba Maria! Maibé mós iha sirkunstánsia ida hanesan ne’e, José deside hakarak halo Maromak nia vontade no deside, maski ho terus boot, atu husik Maria iha segredu. Ita presiza medita kona-ba liafuan sira-ne’e atu komprende sá loos provasaun ne’ebé José tenke liu iha loron sira molok Jezús nia moris. Provasaun ida hanesan ho Abraaun nia sakrifísiu, bainhira Maromak husu nia oan Isaac (kf  Gen 22): husik buat folin liu, ema ne’ebé hadomi liu.

Maibé, hanesan iha Abraaun nia kazu, Na’i intervein: Nia hetan fiar ne’ebé Nia buka no loke dalan oinseluk ida, dalan ida domin no ksolok nian: «José – Nia hateten – keta ta’uk simu Maria nu’udar ó-nia kaben. Oan ne’ebé nia ko’us ne’e hodi Espíritu Santu nia kbiit» (Mt 1,20).

Evanjellu ne’e hatudu S. José ninia espíritu boot. Nia tuir dauduan projetu di’ak ida moris nian, maibé Maromak rezerva ba nia planu seluk, misaun ida boot liu. José mak ema ida ne’ebé nafatin rona Maromak nia lian, sensivel liu ba Ninia hakaran ne’ebé subar, ema ida matan moris ba mensajen sira ne’ebé to’o ba nia husi nia fuan no husi leten. Nia la ulun toos atu tuir ninia projetu moris nian, la husik atu laran-kanek/resentimentu tau venenu ba ninia espíritu, maibé prontu atu tau nia an iha dispozisaun ba novidade ne’ebé, ho modu deskonsertante, aprezenta ba nia. Nune’e, nia ema di’ak ida. Nia la rai hirus, no la husik atu laran-kanek tau venenu ba nia espíritu. Maibé dala hira mak mai ita ódiu, antipatia mós, resentimentu tau venenu ba ita-nia espíritu! No ida-ne’e halo aat. Keta fó lisensa ba buat ne’e: nia mak ezemplu ida kona-ba ne’e. Nune’e, José sai livre no boot liután. Hodi aseita nia an tuir Na’i nia planu, José hetan nia an tomak, hakat liu nia an rasik. Ninia liberdade atu husik buat ne’ebé ninian, ba soi nia ezisténsia rasik, no ninia disponibilidade interiór tomak ba Maromak nia vontade, interpela ita no hatudu dalan mai ita.

Ita prepara ita-nia an atu selebra Natál hodi kontempla Maria no José: Maria, feto nakonu ho grasa ne’ebé iha korajen atu konfia tomak ba Maromak nia Liafuan; José, mane fiél no justu ne’ebé prefere fiar iha Na’i envezde rona lian dúvida no orgullu umanu nian. Ho sira, ita la’o hamutuk ba Belém.