Ossú (Viqueque) – Komunidade Madre Mazzarello, Venilale halo paseiu hamutuk iha loron 26 Dezembru. Konstituisaun Filhas de Maria Auxiliadora nian (FMA) hateten: “Momentu sira rekreiu no distensaun nian iha impaktu signifikativu ba vida pesoál no komunitária, ne’ebé tulun atu mantein ekilíbriu serenu ida, haboot uniaun fuan sira-nian ho modu espontáneu no haberan enerjia ba apostoladu. Ita sei hola parte ho sentidu komunitáriu boot no ksolok fraterna” (Konst.55). Bele haree kedas katak Irmán sira haksolok tebes ho paseiu ida-ne’e ne’ebé iha espíritu no kór “Laudato SI’” nian, basá  lori ami atu haree “buat di’ak liu” (Gen 1,31) Maromak halo iha kriasaun, hanesan jardín iha Gen 2,15.

Fatin komunidade bá atu halo -nia “tour” ekolójiku mak foho “Leki-Raka” ka “Loi-Huno” iha Ossú, hafoin bá liu iha “Bee-Manas Krarás” nian. Iha Leki-Raka, Señor Cândido (eis administradór Ossú nian), esplika mai ami lenda kona-ba deskoberta Leki-Raka nian, husi katuas ida naran “Loi-Huno”. Foho ne’e mak fatuk kuak ida boot tebes, no iha laran iha “estalactitas” forma husi bee iha fatuk kalkáriu nian. Tuir señor Cândido, fatuk kuak ne’e iha nivel tolu, no ami bá haree de’it nivel klaran ka daruak. Fatin ne’e m’os sai fatin rezisténsia Falintil nian durante luta armada ba independénsia.

Se  iha Leki-Raka ami admira natureza nia furak, iha “Krarás” ami halo mós terapia gratuita “sauna” nian, tanba bee termál sira-ne’e iha efeitu di’ak ba saúde. Nune’e, ita bele dehan katak, tebes duni, iha Maromak nia projetu, buat hotu iha “relasaun” ba malu: «entre ema no Maromak no ema ho sasán sira iha armonia sinfonia nian iha-ne’ebé « kriatura ida-idak iha funsaun ida no la iha kriatura ida ne’ebé la folin iha nia an-rasik» (LS 84).

Paseiu ba fatin turístiku sira-ne’e haboot ami-nia enerjia ba misaun edukativa mós. Ba tinan oin, iha fulan Abríl, se Maromak permiti, di’ak atu lori estudante “Escola Técnico-Vocacional Hotelaria e Turismo” ba halo tour hodi koñese fatin turizmu nian ne’e, aleinde kontinua dalan “ekolojia integrál” ne’ebé halo ona.

Komunidade Madre Mazzarello agradese ba Pe. Arlindo Sequeira da Silva (Vigário episkopál ba Assuntos Pastorais, dioseze Baucau nian, tanba nia no ninia família mak sai mata-dalan hodi akompaña ami ba iha fatin furak ne’e. Ami hatene katak, ami foin haree de’it 10 % husi foho “Leki-Raka”, tan ne’e ami dehan “até já”.

(JG)