Leitura sira domingu ne’e nian komplementa malu bainhira aprezenta koordenada fundamentál rua atu harii família sarani ida: domin ba Maromak no domin ba ema sira, liuliu sira ne’ebé besik liu ita – aman-inan no familiár sira seluk.

Evanjellu subliña, liuliu, dimensaun domin ba Maromak: Maromak nia projetu tenke sai prioridade ba sarani hotu, ezijénsia fundamentál, iha ne’ebé sira seluk tenke submete bá. Família sarani hari’i iha respeitu absolutu ba projetu ne’ebé Maromak iha ba ema ida-idak.

Leitura daruak subliña dimensaun domin ne’ebé tenke suli husi ema hotu nia jestu sira, sira ne’ebé moris “iha Kristu” no simu atu sai Ema Foun. Domin ida-ne’e tenke to’o, ho forma espesiál, ba sira hotu ne’ebé fahe ho ita espasu familiár no tenke tradús iha atitude sira komprensaun nian, laran-di’ak nian, respeitu nian, partilla nian, servisu nian.

Leitura dahuluk aprezenta, ho forma prátika tebes, atitude ruma ne’ebé oan sira tenke iha hasoru inan-aman sira. Ne’e mak forma ida atu konkretiza domin ne’ebé leitura daruak fó sai.

Download