Husi Madre Jerál

 

Irmán doben sira,

Iha ha’u-nia fuan iha hakaran boot ida atu to’o ba imi ida-idak, tama iha komunidade ida-idak, hasoru imi-nia oin no hateke ba imi-nia matan sira atu kumprimenta imi ho domin no ksolok kl’ean Natál santu ida no Tinan Foun 2014 riku ho santidade no fekundidade apostólika.

Motivu loos ita-nia ksolok nian mak esperimenta milagre domin Inkarnasaun Maromak nia Oan nian ne’ebé ita simu ho atitude surpreza ema ki’ik nian, ema haraik an nian, ema sira ne’ebé hatene hakfodak ho buak kmanek Nia halo iha Kreda, iha sosiedade mundu nian, iha foin-sa’e sira, iha istória Institutu nian no iha ita ida-idak nia moris. Mistériu boot Maromak nian ne’ebé hili atu sai iha Jezús, ki’ik oan, frajil, kiak atu bele besik ita, nunka para atu halo ita hakfodak. Domin de’it mak bele inventa buat ne’ebé imposivel husi pontudevista umanu. Domin ne’ebé Nia haraik mai ita-nia fuan husi Nia ne’ebé Domin mak bele lori ita besik ba Jezús ne’ebé mai nu’udar kosok-oan.

Jezús iha hateken no laran-nurak espesiál liu ba ema ne’ebé hatene hakfodak ho Ninia mai iha ita leet atu haraik mai ita esperansa foun, atu habiit ita-nia fiar no fanun ita husi rotina loroloron nian ne’ebé dala ruma halo malahuk orizonte ita-nia interioridade no paixaun nian ba anúnsiu Reinu nian no impede ita atu bá hasoru sira ne’ebé kiak liu ho ksolok no fraternidade, atu tulun sira tama iha ita-nia uma, hodi deskobre Maromak rasik nia oin.

Papa Francisco nia mehi mak kreda ida ho “saida misionária”, hanesan ita haree nia evidensia iha Ezortasaun Apostólika Evangelii gaudium. Ita bele hateten: Natál misionáriu ida ne’ebé fekit ho maravilla iha mistériu domin nia oin ne’ebé Jezús lori mai no kria komuñaun, fraternidade, sensibilidade foun ba sira ne’ebé hein ksolok anúnsiu nian. Natál ida ne’ebé enkoraja atu ariska moris rasik atu manifesta katak, loos duni, Jezús kontinua mai ohin atu nakfilak umanidade iha domin. Nia tulun ita atu sai kriativa atu manifesta Ninia domin iha ita-nia moris loroloron.

Ksolok liga metin nafatin ho maravilla no fuan ida ne’ebé hadomi mak iha kapasidade ba atitude sira-ne’e.

Ha’u hakarak tebes atu tempu santu ne’e empeña ita, iha simplisidade moris loroloron nian, atu deskobre ho maravilla no surpreza sinál sira ne’ebé dehan mai ita ita katak Jezús prezente iha irmán ida-idak, iha foin-sa’e ida-idak, iha ema ida-idak ne’ebé ita hasoru nia moris. Iha Natál buat hotu troka no naroman nia raiu ida leno nakukun ne’ebé envolve mundu! Ita konxiente liután bainhira ita nia hateken sai kro’at liután no bainhira ita husik Jezús nia hateken tama iha ita.

Furak tebes prepara ahi-oan sira, dekorasaun sira iha ita-nia ambiente, maibé se ida-ne’e koreografia de’it buat hotu sei liu lalais no ita sei sente nostaljia ba ksolok loos. Ksolok loos nia hun ita hetan iha mistériu domin nian ne’ebé Jezús ohin loron mós, ho modu surprendente no gratutitu, oferese mai ita.

Ita halo ita-nia moris, ita-nia komunidade sira uma ida ho odamatan nakloke atu simu, atu konforta, atu rai di’ak, atu enkoraja no atu haruka ho entuziazmu foun atu komunika Liafoun Di’ak, hanesan dalan preparasaun KJ XXIII konvida ita.

Buat ne’e hotu posivel se ita halo pauza ho Jezús no partisipa iha ninia intimidade. Hodi husik filafali Jezús halo ita admira Nia, mak ita bele sai fekunda iha misaun evanjelizasaun nian ba jerasaun foin-sa’e no komunika ba sira hateken konfiansa nian ne’ebé Jezús iha ba ita ida-idak.

Iha momentu partikulár istória nian ida-ne’e ita labele subar ita-nia preokupasaun ba ita-nia biin no maun-alin sira ne’ebé iha parte barak mundu nian labele selebra Natál iha hakmatek tanba forma oioin violénsia nian, tanba motivu pobreza ekonómika no morál, tanba negasaun ba sira-nia direitu fundamentál sira, ema sira vitima katástrofe naturál sira-nian, iha situasaun funu nian. Ha’u hanoin ba labarik barak, foin-sa’e sira, família sira ne’ebé terus tanba laiha dame. Ha’u sente urjente nesesidade atu nu’udar Institutu ita sai operadora solidariedade nian ho jestu konkretu no esperansa nian.

Tanba motivu ne’e, hodi interpreta imi hotu, ha’u sei bá Médio Oriente atu partilla ho ita-nia irmán sira situasaun ne’ebé ho dignidade no fiar boot sira lori ba oin maski iha konflitu no difikuldade boot moris nian, hodi suporta família barak atu sira keta sente mesak. Ha’u sei lori ba sira imi-nia kumprimentus, imi-nia solidariedade hodi asegura sira imi-nia orasaun.

Ha’u halo votus atu ita nia loron ida-idak sai loron “Natál” nian. Ita husik Maria tulun ita, atu prepara ita-nia uma fuan nian nakonu ho roman, ho sasimun, ho kbiit atu fó fatin ba Na’i ne’ebé mai no fó mós fatin ba ema seluk. Ita husik Maria halo, basá Nia hatene halo di’ak buat hotu no hatene sá mak haksolok Nia Oan Jezús.

Ha’u hafoun votus Natál nabilan ida no Tinan Foun 2014 iha dame no hakmatek, ba imi irmán doben sira no ba imi-nia família sira, ba maun-alin Salezianu sira, ho modu partikulár ba Reitór-Mor padre Pascual Chávez Villanueva, ba membru hotu Famílai Saleziana nian, ba foin-sa’e sira no ba ema hotu ne’ebé ha’u hasoru iha ha’u-nia viajen lubuk ida.

Ha’u agradese ho fuan tomak, hodi mós Konselleira sira nia naran, ba votus lubuk ida ne’ebé to’o mai ha’u no ba seluk ne’ebé sei mai no ha’u promete ha’u-nia orasaun konstante.

Maromak ita-nia ksolok nian haraik bensan ba imi.

Ir Yvonee Reungoat