Dili – Iha loron 23 de dezembru tinan ida ne’e, ami iha oratorio São João Paulo II Tolu Tolu ho ksolok bo’ot selebra Festa Natal hamutuk ho labarik, foin sae , aman –inan no Madre sira husi komunidade. Ami nia atividade iha festa ne’e hahú ho orasaun, lia fuan badak ka Boa Tarde husi Madre Superiora ne’ebé momentu ne’e marka mos prezensa iha ami le’et, drama badak kona ba “Jesus Nia Moris”, merenda hamutuk, fahe prezente no ikus liu fahe malu.

Iha Boa tarde Madre dehan; iha Natal Jesus moris kiak  iha bibi luhan  nune’e ita hotu bele ba Vizita Nia. Tamba Jesus Lori mai ita paz, domin, ksolok no moris hakmatek. Hotu tiha ida ne’e, Oratorianu sira aprezenta drama Natal ne’ebé sira prepara ona ho entuziasmu no ksolok.

Ami hetan tulun ba merenda husi Komunidade, aman –inan no antigo/a animadores sira  nia kontribuisaun ne’ebé tau hamutuk halo ami nia festa sai furak no kompletu liu tan. Iha okaziaun ne’e ami sente  kontente tamba ami bele fahe ba malu ami moris liu husi orasaun hamutuk, ne’e haburas liu tan ami nia fiar, lia fuan diak husi Madre ne’ebé halo ami nia moris sai folin liu tan, atividade hanesan drama ne’ebé haburas liu tan ami nia kapasidade, merenda hamutuk ne’ebé habosu ami nia kabun no fahe prezente ne’ebé ami simu husi kolega labarik sira iha Polandia. Nune’e ami fiar katak ita hotu sei sente ksolok bo’ot tamba Ita nia Maksoin moris ona iha ita le’et.

BOAS FESTAS DO SANTO NATAL E FELIZ  ANO NOVU BA ITA HOTU. HUSI ORATORIANU S. JOÃO PAULO II TASI TOLU.

(Noemia de Jesus)