Francisco iha audiénsia jerál ikus tinan nia: “Maromak ho ita, no sei laran metin ba ita! Maromak mai horik ho ema sira, hili rai nu’udar ninia horik-fetin atu hela hamutuk ho ema no halo ema hasoru Nia iha ne’ebé ema hala’o ninia moris loroloron iha ksolok no eh iha terus.”

Sidade Vaticano/RV – Baibain durante tempu invernu, audiénsia jerál Amu-Papa nian hala’o iha Sala Paulo VI, maibé tinan ne’e, tanba afluxu peregrinu sira ba Roma ne’ebé hakarak kumprimenta Papa Francisco, nune’e maski malirin, audiénsia sira-ne’e hala’o nafatin iha Prasa S. Pedro. Ohin Papa Francisco iha ninia katekeze ko’alia kona-ba tema Natál Jezús nian, razaun ba ita-nia esperansa:

[Asesu kópia ho lia-portugés]

“Maromak ho ita, no sei laran metin ba ita! Maromak mai horik ho ema sira, hili rai nu’udar ninia horik-fetin atu hela hamutuk ho ema no halo ema hasoru Nia iha ne’ebé ema hala’o ninia moris loroloron iha ksolok no eh iha terus.”
“Jezús nia  Natál mak manifestasaun Maromak nian ne’ebé hili ba dala ida ba nafatin atu hela iha ema nia parte, atu salva ita, atu hasai ita husi rai-rahun ita-nia mukit nian, ita-nia difikuldade no salan sira.”

Santu Padre afirma katak mistériu Natál nian hanorin ita katak, se Maromak lakohi hatudu nia An nu’udar Ida-ne’ebé hateke husi leten no domina lalehan no rai, maibé haraik An no tuun mai rai ki’ik-oan no kiak, entaun, atu ita sai hanesan Nia, ita keta tau ita-nia an iha ema seluk nia leten maibé haraik ita-nia an sira, tau ita-nia an atu serví, halo an sai ki’iki ho ki’ik sira no kiak ho kiak sira.

Natál hanorin mós ita –Papa Francisco kontinua – katak se Maromak, liuhusi Jezús Kristu, envolve an ho ema to’o sai ida hanesan ita, entaun buat hotu ne’ebé ita halo ba maluk ida, ita halo ba Nia, hanesan Jezús rasik hanorin: «Bainhira imi fó han, imi simu, imi vizita ida husi Ha’u-nia maun-alin ne’ebé ki’ik liu, imi halo ne’e mai Ha’u».

Atu Maria, Jezús nia Inan no ita-nia Inan, alkansa mai ita grasa atu halo ita hato’o ba ema hotu ita-nia laran-di’ak no laran-luak. Halo nune’e – Santu Padre hatutan – ita sai reflexu Jezús nia naroman nian, ne’ebé kontinua leno, husi gruta Belém nian, ba em ania fuan sira, hodi oferese ksolok no dame.