Iha tempu ikus nian molok Natál, mensajen fundamentál Maromak nia Liafuan nian ko’alia kona-ba misaun fundamentál Jezús nian: propoin projetu ida salvasaun no libertasaun nian ne’ebé lori ema sira atu deskobre ksolok loos.

Evanjellu sujere katak Maromak nia projetu ne’e iha oin ida: Jezús Nazaré mai hasoru ema sira atu aprezenta ba sira ne’ebé ida dadur no nakukun laran proposta ida moris no liberdade nian. Nia propoin mundu foun ida, iha ne’ebé ema marjinalizadu no oprimidu sira hetan fatin no sira ne’ebé terus hetan dignidade no ksolok. Ida-ne’e mak anúnsiu ida ksolok no salvasaun nian, ne’ebé halo haksolok ema hotu ne’ebé rekoñese iha Jezús proposta libertadora ne’ebé Maromak halo ba nia. Proposta ne’e, dala barak to’o mai liuhusi limite no frajilidade “instrumentu” umanu Maromak nian; maibé nafatin proposta ida ne’ebé soi Maromak nia marka no kbiit.

Leitur dahuluk sujere katak mundu foun ne’ebé Jezús, David nia bei-oan, mai atu propoin mak don ida husi Maromak nia domin. Naran Jesus signifika “Dame”. Nia mai aprezenta proposta ida kona-ba “reinu” ida dame no domin nian, ne’ebé la hari’i ho kbiit kilat nian, maibé hari’i no hetan simun iha ema sira nia fuan.

Leitura daruak sujere katak misaun libertadora Jezús hakarak harii mak estabelesimentu relasaun komuñaun no prosimidade nian entre Maromak no ema sira. Nune’e ema sira presiza simu proposta ne’e ho disponibilidade no obediénsia – tuir Jezús Kristu nia ilas – ho “sin” totál ba Maromak nia projetu.

Download