Venilale – ADMA Timor-Leste halibur hamutuk iha Venilale, husi loron 15-16 Dezembru atu halo preparasaun ba Natál.  Sira hamutuk na’in 216  husi fatin-fatin, no ADMA Venilale mak sai uma-na’in. Hamutuk ho Delegadu nasionál Pe. Manuel Ximenes SDB, Irmán FMA na’in haat mak akompaña sira: Ir Alexandrina Pinto (Venilale), Ir Alice Gama (Laga), Ir Ermelinda da Silva (Fuiloro) no Ir Evangelina Xavier (Balide-Dili).

Tuir sira-nia programa sira iha enkontru formativu rua: 1) Liturjia liuliu kona-ba Missa; 2) Santidade ba ema hotu, estreia Reitór-Mor nian. Aleinde ne’e sira iha tempu ba orasaun (Taizé) no hakbesik ba Sakramentu Peniténsia no Rekonsiliasaun, nune’e mós tempu ba  avaliasaun programa ba sira-nia Asosiasaun.

Kona-ba liturjia, Ir Jacinta Gusmão FMA foka liuliu ba signifkadu liturjia hodi diferensia husi prátika devosionál sira. Iha liturjia iha movimentu rua: Maromak tun mai atu salva ita no lori ita sa’e ba lalehan hodi halo ita sai santu. Nia salienta katak iha Liturjia ita selebra ita-nia fiar no fiar hetan kbiit husi orasaun atu ita moris fiar ne’e iha vida konkreta: “lex credendi, lex orandi, lex vivendi”. Sarani Timor barak seidauk komprende di’ak importánsia liturjia nian. Hodi kompara ho lisan Timor nian bainhira halo uma-lisan ka uma-lulik, ita bele dehan katak ita-nia uma-lisan mak Uma-Kreda, fatin lulik ne’ebé dalabarak ita la respeita hanesan uma-lulik sira. Irmán Jacinta esplika signifikadu espasu litúrjiku kreda nian, fatin lulik tolu hanesan kátedra ne’ebé hatudu fatin ukun nian, ambaun nu’udar fatin ne’ebé hatudu knaar mestre no profeta, no altár ne’ebé hatudu knaar amlulik no sakrifísiu Kristu nian. Hafoin nia esplika Missa parte por parte, hodi subliña partisipasaun ativa, konxiente no frutuoza sarani nian, jestu no postura sira no knaar litúrjiku ruma, liuliu knaar leitór/a nian, akólitu, animasaun múzika litúrjika.

Pe.Apolinário Neto SDB hato’o komunika Reitór-Mor nia estreia ba 2019: “Santidade ba imi mós” . Reitór-Mór  foti Amu-Papa Francisco nia ezortasaun apostólika  “Gaudete et exsultate” hodi dehan katak Amu-Papa hakarak ita fó atensaun ba saida mak esensiál iha ita-nia moris sarani, katak santidade. Santidae ne’e prezente ida maibé mós devér ida, resposabilidade ida. Ne’e mak finalidade ita-nia moris nian. Don Bosco, edukadór santu ne’ebé prodús foin-sa’e santu. Iha nia surat husi Roma (10 Maiu 1884), Don Bosco hakerek ba nia foin-sa’e sira nune’e: “ida-ne’e de’it mak ha’u hakarak atu haree imi haksolok iha tempu no iha eternidade”. Nune’e atu eduka ba santidade, ita mak uluknanai tenke sai santu.

Iha Reitór-Mor nia surat nia fó pontu ruma espiritualidade saleziana nian hanesan: santidade mak umanidade nia floreximentu, katak santidade nia baze mak ema. Santidade mak dalan umanizasaun nian; sai santu ne’e hamutuk, iha komunidade, tanba hamutuk sai fasil liu, tulun malu; nune’e santidade iha família importante liu atu bele enkoraja santidade juveníl.

Saida mak hatudu santidade, ka indikadór saida de’it? Reitór-Mor hakerek katak indikadór ruma mak ema nia moris hatudu “frutos do Espírito Santo”: domin, ksolok, dame, pasiénsia, fidelidade, amabilidade, domina-an. Indikadór seluk mak moris virtuozu katak hadomi buat di’ak no moris tuir. Santidade nia indikadór seluk mak komuñaun, komuñaun ekleziál. Santu sira kriativu no inventa, la’ós repetitivu tanba sira dosil ba Espíritu nia inspirasaun. Porezemplu, Don Bosco nia karizma buras  no hamosu Família Saleziana grupu barak.

Nune’e husi Liturjia Maromak haraik grasa hotu atu ita bele sai santu/a no ita-nia knaar mak kolabora ho Maromak nia grasa hodi haburas ita-nia umanidade no to’o ba nia tutun aas liu: “profundamente umanu no profundamente santu”.