Venilale – Tempu Adventu mak tempu propísiu atu prepara an atu simu Na’i ne’ebé mai. Parókia Sagrado Coração de Jesus oferese oportunidade ida-ne’e ba estudante sira husi “ensino base IV ano” to’o escola nivel sekundária.

Irmán FMA sira mak fasilita preparasaun ida-ne’e hodi fó reflesaun iha grupu ho dinámika ruma ka atividade no mós hodi prepara ba konfisaun ho selebrasaun penitensiál .

Hodi hanoin ba ezortasaun Papa Francisco nian ba Santidade iha “Gaudete et Exsultate”, labarik no foin-sa’e sira simu konvite atu konfronta an ho Lia-Loos Maromak nia domin, lalran-luak no laran-sadia, hanesan haktuir iha Evanjellu Rahun-Di’ak nian no “Dekálogu”.  Evanjelista sira fó hanoin katak Maromak Santu, Maromak perfeitu no nia hakarak nia oan sira mós sai perfeitu, sai santu hanesan Aman Lalehan. Amu-Papa Francisco iha “Gaudete” n. 14 dehan: “Ita hotu simu vokasaun atu sai santu hodi moris ita nia moris ho domin no hodi fo sasin iha buat hotu nebe ita halo, iha fatin naran de’it ita hela”.

Nune’e iha ezame konxiénsia nian sira agradese ba Maromak nia don hotu, ita konfronta ita-nia an ho Ukun-Fuan Maromak nian no ita husu perduan hodi halo propózitu atu fiél ba Ninia domin.

Depoizde reflesaun, labarik no joven sira hakbesik ba Sakramentu Peniténsia no Rekonsiliasaun ho konfesór Salezianu na’in tolu disponivel ba sira: Pe. Abrão, Pe. Júlio no Pe. Jolino. Hakbesik tiha ba Sakramentu Rekonsiliasaun, sira mós hetan oportunidade atu selebra Eukaristia hodi nune’e hamutuk ho Jezús nia sakrifísiu, renova sira-nia an atu sai Maromak nia oan sira hodi to’o ba komuñaun metin ho Maromak, halo dalan santidade tuir sira-nia knaar loroloro. Papa Francisco hateten atu “Keta ta’uk santidade. Santidade sei la hasai imi-nia enerjia, moris ka ksolok. Lae, imi sei sai buat ne’ebé Aman hanoin bainhira nia hakiak imi… Atu depende husi Maromak halo ita livre husi forma hotu moris atan nian no lori ita atu rekoñese ita nia dignidade boot” (GEE 32).

Ita hein fini fiar ne’e bele sai buras ba beibeik, hodi “halo grasa ita nia batizmu nian fo fuan iha dalan santidade. Halo buat hotu nakloke ba Maromak; fila ba nia iha situasaun hotu” (GEE 15). Nune’e, ita hein, foin-sa’e sira bele sai sarani di’ak no sidadaun onestu, tuir Aman Don Bosco nia hakarak.