Dili, 13 Dezembru 2018, alunos /as husi Sentru Formasaun Computer Balide  hamutuk 34 ne’ebe ohin remata sira nia kursu durante tinan ida nia laran hetan susesu liu husi  graduasaun.

Marka mos prezensa iha Seremonia nee: Secretario Estado da SEPFOPE , Sr. Julião da Silva, Madre Alma Castagna, FMA nu’udar Directora Jeral do Curso, reprezentante INDMO, Sr. Amandio Belo , no mos reprezentante Director/a kada Ministerio.

Molok atu too ba loron graduasaun nian, alunos sira mos prepara an espiritualmente hodi organiza retiru hamutuk ho Tema “ Dixernimentu” ne’ebe  hato’o husi Pe. Inocencio da Silva sdb. Iha topic ne’ebe koalia kona ba dixernimentu liga mos ho dixernimentu husi an rasik atu hili ou deside buat diak ka aat depende ba desisaun husi an rasik. Oferese mos konfesaun no Eukarista ba Alunos sira ne’e, atu bele tau fiar metin ba sira nia kompromisu batizmu nian nudar ema sarani no sidadaun onesto.

Loron graduasaun nian sai loron especial tanba sira hotu ho entuaziazmu prepara an atu simu Sertifikadu nu’udar sinal sira nia esforsu an ba tinan ida iha Sentru Formasaun Balide.

Madre Alma Castagna, FMA  nu’udar provinsial Timor –Indonesia  sai mos nu’udar Directora Jeral ba Sentru ne’e, hato’o mos liafuan korajen nian hodi dehan: Presiza tebes atitude rona niani ha kampu serbisu nian. Tanba laos fasil atu hetan serbisu kedas presisa dezenvolve an ho matenek ne’ebe imi hetan iha Sentru ida ne’e.  Madre mos foti karikteristika Don Bosco nian kona ba inovasaun. Don Bosco iha ninia eskola, no mos iha Kursu Profesional maibe buka nafatin buat ne’ebe foun ne’ebe tulun foinsae sira atu hetan serbisu ho kualifikadu.  Tinan ne’e iha mos esperensia foun hahu ho material Finansa/ Kontabilidade kada Sabadu ho mestre Abelino de Jesus Marçal nu’udar treinador ba sira.  Bazea mos ba sujestaun husi  fatin serbisu nian mak Sentru foti desizaun atu hasae kapasidade iha Area finansa nian hodi hatan ba foinsae sira nia presiza ohin loron. Sentru ne’e koko atu adapta ba buat ne’ebe exijente  forte iha moment ida ne’e.  keta hauha buat ne’ebe  imi nia formadora sira  fo ba imi, sira buka atu fo buat ne’ebe diak liu ba imi ida-idak.

Iha momentu ne’e Sr. Ines mos  nu’udar coordenadora do Kursu hato’o mos relatoriu badak kona ba lalaok kursu nian ne’ebe implementa  ona iha sentru ida ne’e.  Alunos sira bainhira hahu hamutuk 46, maibe to’o klaran balun laremata tamba razaun pesoal no seluk seluk tan.  Oras ne’e dadaun graduadu sira ne’e hamuruk 34, mane 3 e feto 31. Graduadu sira ne’e mai husi Municipiu Lautem 13, Dili,  7, Viqueque 4, Maliana, 3, suai 3, Liquisa 1, Manatuto 1, e Baucau 1.

Sentru ne’e nia objetivu mak atu prepara foinsae feto no mane sira ho kualifikasaun profisionál no nakonu ho  valor  umano no kristaun, nunee sira prontu atu sai ativa iha vida sosiál, integra an iha kampu serbisu nian ho dignidade kompetensia no sentidu responsabilidade nian.

Tuir mai Secretario Estadu da SEPFOPE, Sr. Julião da Silva hatoo mos diskursu ba graduadu sira hodi dehan:  tinan ne’e ba oin SEPFOPE sei hakaas atu hadia baze de dadus, atu nune’e bele hasae kapasidade iha sentru formasaun  hodi prepara foinsae sira atu sai lider ne’ebe kualifikadu.  SEPFOPE promote sei kontinua fo apoiu ba Sentru Formasaun sira ne’ebe hetan akreditasaun . Presiza mos atu kuda iha formandu ida-idak valor Kristaun diak nian hodi nu’nee sira bele atinji sira nia mehi ho susesu.

Ikus liu Secretario Estado da SEPFOPE ho director/a sira ba vizita aula partika Computador no  aula teoria nian ne’ebe bain –bain aluno sira uza atu halao sira nia aprendizajen durante tinan ida nian laran. Ikus mai  konfratenizasun hamutuk  nudar simbolo ksolok nian ba sira hotu ne’ebe ohin simu garduasaun.

Bom Susesu.