Maun no biin-alin doben sira, bondia!

Domingu kotuk liturjia konvida ita atu moris tempu Adventu no espetativa Na’i nian ho atitude matan-moris no mós orasaun: “imi matan moris” no “harohan”. Ohin, domingu daruak Adventu nian, ita simu indikasaun kona-ba oinsá fó substánsia ba espetativa ida-ne’e: hodi halo dalan ida konversaun nian, oinsá halo sai konkreta espetativa ida-ne’e. Nu’udar mata-dalan ba dalan ne’e, Evanjellu aprezenta figura João Batista nian, ne’ebé «bá iha rejiaun hotu Jordão nian, hodi haklaken batizmu ida konversaun salan sira nian» (Lc 3,3). Atu deskreve Batista nia misaun, evanjelista Lucas foti profesia antiga Isaías nian, ne’ebé dehan nune’e: «Lian husi ida ne’ebé hakilar iha rai-fuik: Prepara Na’i nia dalan, haloos dalan sira! Taka tiha rai kle’an hotu, hatún foho tomak, aas no badak» (vv. 4-5).

Atu prepara Na’i ne’ebé mai nia dalan, presiza tau atensaun ba konversaun ne’ebé Batista konvida. Sá de’it ezijénsia sira konversaun ida nian? Uluknanai ita simu bolun atu rekupera kuak sira ne’ebé rezulta husi laran-malirin no indiferensa, hodi loke an ba ema seluk ho Jezús nia sentimentu rasik, katak ho kordialidade no atensaun fraterna ne’ebé ita responsavel ba maluk nia nesesidade. Rekupera kuak sira rezultadu husi laran-malirin. Labele iha relasionamentu ida domin nian, karidade nian, fraternidade nian ho maluk se iha “kuak sira”. Nune’e mós labele la’o iha lurón ida ho kuak barak. Ida-ne’e husu atu muda atitude. No buat ne’e hotu, halo mós ho kuidadu espesiál ba ema sira ne’ebé presiza liu. Hafoin presiza hatun liafuan maka’as mai husi orgullu no foti-an. Ema na’in hira mak, karik hodi la konxiente, foti an, lian maka’as, la iha relasionamentu kordialidade nian. Presiza supera hodi kalo jestu konkretu rekonsiliasaun nian ho ita-nia maun-alin sira, husu perdaun ba ita-nia kulpa sira. La’ós fasil rekonsilia malu. Ema hanoin nafatin: “sé mak sei halo ain-hakat dahuluk?”. Na’i tulun ita, se ita iha vontade di’ak. Konversaun, defaktu, sai kompleta se lori atu rekoñese ita-nia erru sira, ita-nia infidelidade sira, omisaun sira.

Fiar-na’i mak ema ne’ebé, liuhusi ninia sai besik ba maluk, hanesan Joao Batista loke dalan iha rai-fuik maran, katak hatudu perspetiva esperansa nian maski iha ezisténsiál ne’ebé susar atu liu, marka ho frakasu no derrota. Ita labele rende iha situasaun negativa sira taka-an no rejeisaun nia oin; ita labele husik ita-nia an sai atan ba mentalidade mundu nian, tanba ita-nia moris nia sentru mak Jezús no ninia liafuan roman nian, domin nian, konsolasaun nian. Nia duni! Batista konvida ho forsa, maka’as, ho severidade ema sira nia tempu nian ba konversaun . Maski nune’e, nia hatene halo jestu ternura nian, jestu sira perdaun nian ba ema lubun-boot mane no feto sira ne’ebé bá hasoru nia atu konfesa sira-nia salan rasik no husik niafó batizmu ho batizmu peniténisa nian.

João Batista nia sasin, tulun ita atu bá oin iha ita-nia sasin moris nian. Ninia pureza anúnsiu nian, ninia korajen atu haklaken lia-loos konsege fanun espetativa no esperansa ne’ebé ba tempu kleur mak toba dukur tiha. Ohin mós, Jezús nia dixípulu sira simu bolun atu sai ninia sasin haraik an maibé barani atu halakan hikas esperansa, atu halo ema komprende katak, maski mosu buat oioin, Maromak nia reinu kontinua atu hari’i loron ba loron ho Espíritu Santu nia kbiit. Ita hanoin, ita ida-idak: oinsá ha’u bele muda buat ruma iha ha’u-nia atitude, atu prepara Na’i nia dalan?

Virjen Maria tulun ita atu prepara loron ba loron Na’i nia dalan, hahú husi ita-nia an rasik; no atu kari iha ita-nia sorsorin, ho pasiénsia maka’as, fini dame, justisa no fraternidade nian.