Tema Domingu ne’e nian hale’u lia-husun ida: “no ami, sá loos mak tenke halo?” Prepara “dalan” husi ne’ebé Na’i sei liu signifika husik ita-nia limite sira, ita-nia egoízmu no komodizmu no halo transformasaun loos moris nian tuir Maromak nia konvite.

Evanjellu sujere aspetu tolu iha-ne’ebé transformasaun ne’e nesesária duni: presiza sai husi egoízmu no aprende fahe; presiza harahun eskema sira esplorasaun no imoralidade nian no hakat ba oin ho justisa; presiza hakribi violénsia no prepoténsia  no respeita maun-alin sira-nia dignidade. Evanjellu aviza mai ita mós, katak ema sarani “simu batizmu iha Espíritu”, simu husi Maromak moris foun no tenke moris tuir dinámika ida-ne’e.

Leitura dahuluk sujere katak, iha dalan konversaun nia inísiu, klaran no rohan, Maromak ne’ebé hadomi ita hein hela ita. Nia domin la perdua de’it ita-nia salan sira, maibé provoka konversaun, nakfilak ita no hafoun ita. Husi ne’e mak mai konvite ba ksolok: Maromak iha ita-nia leet, hadomi ita no, apezarde buat hotu, nia insiste atu halo dalan ho ita.

Leitura daruak insiste kona-ba atitude loos sira ne’ebé tenke marka ema sira ne’ebé hakarak simu Na’i iha sira nia moris: ksolok, laran-di’ak, orasaun.

Download