Domingu I Adventu – Tinan C
Iha Domingu dahuluk Tempu Adventu nian, Maromak nia Liafuan aprezenta mai ita aprosimasaun dahuluk ba Na’i ne’ebé atu mai.
Iha leitura dahuluk, liuhusi profeta Jeremias nia ibun, Maromak aliansa nian haklaken katak nia fiél ba ninia promesa sira no sei haruka ba nia Povu “tubun” ida husi família David nian. Nia misaun maka konkretiza mehi kona-ba mundu ida dame no justisa nian: fekundidade, moris di’ak, moris naresin, maka rezultadu sira husi Mesias nia hahalok sira.
Evanjellu aprezenta Jezús mai ita, Mesias David nia oan, haklaken hela ba ema sira ne’ebé sente an nu’udar dadur: “haksolok bá, imi-nia libertasaun besik daudaun ona. Mundu tuan ne’ebé dadur imi atu monu daudaun no, iha nia fatin, sei moris mundu foun ida, iha-ne’ebé imi sei koñese liberdade no moris nakonu. Matan moris bá, atu simu Mane Makso’ik ne’ebé lori mai imi projetu mundu foun ne’e nian”. Presiza rekoñese nia, hatene identifika ninia apelu sira no iha korajen atu harii, hamutuk ho Nia, justisa no dame.
Leitura daruak konvida ita atu keta hela iha mediokridade no komodizmu, maibé hein ho atitude ativa Na’i ne’ebé atu mai. Fundamentál tebes iha atitude ida-ne’e, moris iha domin: nia mak sentru ba ita-nia sasin pesoál, komunitáriu, ekleziál.
