Venilale – Iha loron selebra memória Aprezentasaun Na’i-Feto nian, komunidade edukativa S. Maria Mazzarello, konvida Pe. Adolfo Sarmento, Venilale nia oan, salezianu misionáriu iha Maputo (Moçambique) atu mai fahe nia esperiénsia no fó lia-menon ba estudante sira, molok sira ba férias no halo estájiu, hodi prepara an ba Adventu. Amu Adolfo husi kedas tinan 1996 sai misionáriu bainhira nia sei tinan 22. Oras-ne’e nia Mestre Novisu sira-nian iha Maputo. Nia iha novisu 14 husi nasaun rua.

Molok Eukaristia, Amu Adolfo fó konferénsia kona-ba oinsá prepara an atu simu Jezús ne’ebé mai, durante tempu Adventu. Nia foti ezemplu husi Na’i-Feto. Nia mak modelu di’ak liu oinsá hatene hein ho “matan moris no neon matenek”. Hein ho matan moris katak la dukur iha mundanizmu no lanu maibé atu ho neon matenek fó tempu ba Maromak iha silénsiu hodi rona ninia Lian. Nia fó dalan tolu, tuir Papa Francisco nia hanorin atu prepara an ba Natál hanesan “orasaun hodi hela ho Na’i”, “detach” husi mundu nia babeur no “attach” an ba Kristu. Dalan daruak mak “sakrifísiu”, tanba “la’ós fasil atu husik família, husik sasán sira mundu nian, la dasa telefone…”. Dalan datoluk mak “karidade”. Nia esplika mós diferensa entre “eros”, “filia” no “ágape”. Karidade mak domin degrasa ita fó ba maluk sira hanesan Kristu rasik halo to’o hedi iha Ai-Krus.

Hotu tiha konferénsia nia dedika tempu ba administra Sakramentu Konfisaun ba sira ne’ebé presiza no hakarak. Hafoin, iha selebrasaun Eukaristia, Amu Adolfo, hodi hatán ba pergunta ida molok husi Ir Jacinta Gusmão kona-ba oinsá dixerne Maromak nia bolun, iha omilia nia fó ezemplu Na’i-Feto nian: “Rona Maromak nia Liafuan no moris tuir”, nune’e bele sai Jezús nia dixípulu, Jezús nia família, Jezús ninia manu-ain. Ne’e mak atitude atu hola iha tempu “adventu” nian. “Atu rona”, nia salienta tan nesesidade atu “hela ho Na’i” atu Jezús-Mestre bele treinu, dixiplina ita hodi prepara ita atu sai hanesan Nia, manu-ain Aman nian.

Hotu tiha Missa, estudente sira kumprimenta Pe Adolfo no nia responde hodi hanorin knananuk Magnificat, no konklui ho Rozáriu hamutuk. Hotu tiha momentu marianu, iha han-kalan hamutuk ho komunidade FMA. Irmán sira agradese tebes nia ba ninia ezemplu saran an misionáriu no ninia disponibilidade atu mai ho ami. Obrigada barak Amu Adolfo Sarmento, no hein katak fini ita kari bele fó fuan ruma iha foin-sa’e sira ETV Madre Mazzarello nian.