Iha Domingu da-34 Tempu Komún nian, ita selebra Solenidade Jezús Kristu, Na’i no Liurai Lalehan no Rai nian. Maromak nia liafuan ne’ebé propoin iha domingu ikus tinan litúrjiku nian konvida ita atu foti konxiénsia kona-ba Jezús nia ukun nu’udar liurai; maibé nia hatudu mai ita momoos katak Jezús nia ukun la’ós tuir liurai sira mundu nian: nia ukun konkretiza ho lójika rasik, lójika Maromak nian. Evanjellu, esplika sá loos Jezús nia lójika.

Leitura dahuluk haklaken katak Maromak intervein iha mundu, atu elimina buat aat hotu, ambisaun, violénsia, opresaun ne’ebé marka istória reinu sira-nian iha mundu ne’e. Liuhusi “mane makso’ik” ida ne’ebé sei mosu “iha kalohan leten”, Maromak sei fó fali ba istória ninia dimensaun “umanidade” nian, hodi posibilita atu ema sira sai livre no moris iha dame no hakmatek laran. Sarani sira haree iha “mane makso’ik” nia vitória, anúnsiu kona-ba Jezús nia ukun nu’udar liurai.

Iha leitura daruak, autór livru Apokalipse nian aprezenta Jezús nu’udar Na’i Tempu no Istória nian, inísiu no rohan buat hotu nian, “liurai-boot liurai hotu rai ne’e nian”, Ida-ne’ebé sei mai “iha kalohan leten” nakonu ho kbiit, glória no ukun atu instaura reinu defintivu ida ksolok nian, moris no dame nian. Ne’e mak loos duni, interpretasaun kristán ba figura “mane makso’ik” ne’ebé leitura dahuluk haktuir.

Evanjellu aprezenta mai ita, kuadru dramátiku ida, Jezús asume nia kondisaun liurai nian iha Pontius Pilatus nia oin. Jezús hatudu katak ninia ukun la hatuur iha eskema ambisaun, podér, autoridade, violénsia nia leten, hanesan akontese ho liurai sira rai nian. Jezús nia misaun loos mak “fó sasin lialoos nian”; no konkretiza iha domin, servisu, partilla, don moris nian.

Download