24 Setembru  2013

Irmán doben sira,

haktuir fali eventu ida ne’ebé envolve ita hotu iha tinan 25 la’ós fasil. Rekordasaun sira naklekar iha tempu, rai di’ak iha ema sira nia fuan; faktu sira konfunde ho emosaun sira; difikuldade sira hamutuk ho korajen inísiu nian, motivasaun sira simu kbiit husi serteza katak Maria Ausiliadora la’o uluk ba ami no ita-nia “Maìn” iha uluk ona iha Timór atu hein ami, mak konviksaun sira ne’ebé tahan ami no akompaña ami iha dalan to’o ohin loron.

Lójika ne’ebé gia ami iha inísiu Institutu nian iha Timór mak ida Mornese nian katak ida fini ki’ik-oan ida ne’ebé neineik-neineik, maski ho frajilidade sira, sai boot no ohin loron sai ai-hun ida! Ai-hun ida sei nurak maibé ho potensialidade hotu atu sai forte no abut metin.

Liutiha tinan 25 ho ksolok ita bele “Hahi’i no Agradese” Maromak boot iha Domin ba kreximentu ida-ne’e ne’ebé hananu milagre!
Ho Maria ita hateten: “Na’i halo kmanek boot iha ita…  Nia hakonu ita ho di’ak hotu”.

Loos duni, irmán doben sira, ho fiar ita hasa’e ita-nia knananuk GRATIDAUN nian ba MAROMAK, ho fuan haraik-an no kiak MARIA nian, Nia ne’ebé “HALO BUAT HOTU” ba karizma nia kreximentu no dezenvolvimentu iha Timór no Nia ne’ebé halo kmanek iha ita-nia moris no iha Inspetoria nia moris!  

Eventu jubilár ne’ebé ita moris konvida ita atu halo memória orijen karizmátika Institutu nian, orijen ne’ebé marka ho profundidade ho Maria nia prezensa.  Halo memória signifika filafali ho ksolok ba bee-matan karizma nian atu halo nia sai ohin loron mós bee-matan ne’ebé hasuli santidade, aten-barani apostóliku, don inkondisionál ba foin-sa’e sira feto no mane, liuliu sira ne’ebé presiza liu domin, komprensaun, ksolok loos.
Karizma salezianu iha ita-nia rai timorense kari duni iha tinan Marianu no tinan Sentenáriu Don Bosco nia mate nian. Nune’e, iha rai ida-ne’e, ita mak “Maria no Don Bosco nia don” ba foin-sa’e feto no mane kiak liu Timór nian!
Buat sira ne’e mak koinsidénsia signifikativa sira ne’ebé ko’alia ba fuan no sai apelu atu tau ita-nia an hotu no misaun ne’ebé entrega mai ita, iha Maria nia liman, ita-nia Inan no Edukadora, Nia ne’ebé prezente uluk mai ita iha nusa furak ida-ne’e.

Ha’u konvida imi ohin irmán doben sira, iha tinan 25 fundasaun nian, atu rona fila fali ho emosaun liafuan ne’ebé Don Bosco hateten iha sala-bainaka ki’ik-oan iha Nizza Monferrato iha 23 Agostu 1885.  Mai ita rona liafaun sira hanesan dirije ba ita ida-idak no ba ita-nia komunidade ida-idak: “Ha’u hakarak dehan ba imi katak Na’i-Feto hadomi, hadomi liu imi no nia iha imi leet… Na’i-Feto pasiar ba mai iha uma ne’e no nia taka nia ho ninia mantu (Cron. V 48-52). Ninia pasiar ba mai iha ita-nia uma sira fó seguransa, konfiansa, ksolok kle’an ba ita-nia moris!

Memória fuan nian sai agradesimentu no agradesimentu ne’e haluan ba ema hotu ne’ebé ho modu diretu eh indiretu mehi hamutuk ho ita!

Lembransa partikulár ba Madre Marinella ne’ebé oras-ne’e husi Lalehan hamnasa mai ita no suporta ita; ba Madre Antonia no ba ita-nia Madre Yvonne doben tanba sira halo ita sente nafatin Maria nia domin inan nian. Sira-nia enkorajamentu, konfiansa no komprensaun lori ita atu barani koko “buat foun” Maromak nian ba rai ida-ne’e. Sira halo moruk ho ita-nia pobreza no konfia iha ita, tanba ne’e mak moris sai buras!!!

Obrigada ba Konselleira Vzitadora sira ne’ebé iha tinan 25 ne’e mai vizita ita hodi habiit iha ita sentidu hola-parte nian no kria espíritu komuñaun kle’an!

Lembransa nakonu ho agradesimentu ba Ir. Lina Chiandotto, Ir. Anna Maria Matiussi, Ir. Felicidad Boado, Ir. Lourdes Pino no irmán wain ne’ebé liu iha ita-nia leet no marka ho modu oioin kreximentu karizma nian iha Timór.

Agradesimentu kle’an ha’u hato’o ba Família Saleziana, ho modu partikulár maun-alin Salezianu sira ne’ebé mai molok ita no akompaña ita iha misaun furak ida-ne’e, liuliu prepara terrenu ba kultivu vokasionál iha foin-sae barak nia fuan. Sira-nia minsitériu saserdotál, sasin laran-manas apostóliku, partilla paixaun edukativa Don Bosco nian no domin sinseru ne’ebé fó mai ita,  dudu nafatin atu tau hamutuk kbiit sira atu enfrenta ho aten-barani no esperansa kona-ba buat foun iha misaun ida-ne’e ba foin-sa’e kiak wain nia di’ak.

Obrigada ba irmán Timór-oan sira nia família ba prezente sira-nia oan-feto nian ba Maromak no ba Institutu, ba kolaboradór/a leigu/a sira, benfeitór/a sira no belun sira. Ha’u hakarak hanoin ho modu espesiál família Duarte no Ximenes, ne’ebé husi inísiu kedas besik liu mai ami no tulun ami manán difikuldade sira inísiu nian! Na’i haraik bensan no rekompensa sira-nia laran-luak!

Obrigada ba ita-nia foin-sa’e sira iha formasaun, ba foin-sa’e feto no mane sira no ba labarik feto no mane sira ita-nia komunidade nian ne’ebé loroloron oferese oportunidade atu halo karizma nia fuan fekit! Se ohin karizma salezianu moris iha Timór ne’e tanba foin-sa’e feto no mane sira rai ne’e nian!

Ha’u agradese konselleira inspetoriál hotu ba sira-nia kolaborasaun fraterna ba servisu hala’o ho laran-luak no ho kompeténsia ba Inspetoria nia animasaun. No ikusnian obrigada ba imi, irmán doben sira Inspetoria nian ba imi-nia fidelidade no imi-nia domin ba Jezús nia bolun, ba pasiénsia, konfiansa no fiar iha mediasaun sira, ba imi-nia saran-an iha ksolok iha servisu auténtiku ba foin-sa’e kiak liu, ba paixaun boot  “Da mihi Animas” ne’ebé halo ita sai ida no dudu ita atu haklaken!

Ba ita FMA sira, selebra tinan 25 signifika moris nafatin ho konxiénsia grasa no empeñu atu sai, hanesan Don Bosco hakarak, monumentu moris gratidaun nian ba Maria, Nia ne’ebé “halo buat hotu”. Nakonu ho agradesimentu ba don ne’e, ita simu bolun atu hakle’an nia, atu halo nia sai esénsia no fundamentu ita-nia espiritualidade nian, atu lori iha moris konkretu loroloron nian liuhusi “fiar moris no auténtiku”!

Eventu jubilár tinan 25 ita-nia prezensa iha Timór, la’ós pontu to’o ona nian, maibé inísiu dalan ida nian ba jubileu osan-mean. Loron foun inísiu ne’e nian hetan ita iha diálogu ho Maria Ausiliadora , ba Nia ita entrega an intensidade boot domin nian. Se “ita lori Maria iha ita-nia uma”, se ita lori Nia iha fuan, it abele hateke ba oin ho fiar no esperansa no ita-nia misaun apostólika no pastorál sei sai efikás basá Nia sei hanorin ita oinsá husik ita-nia an atu Maromak nia liman-fatin iha ita plasma ita!                                              
Na’i haraik bensan ba inísiu foun ne’e no Maria Ausiliadora haraik mai ita-nia fuan ksolok hola-parte nian ba karizma ida ne’ebé moris nafatin iha Kreda no iha sosiedade!

Irmán Paola Battagliola