Venilale – Gabinete Apoio à Actividade de Conjuge Presidéncia República (GAAC-PR) apoiu sasán nesesidade bázika hanesan fos, mina, roupa no sasán seluk tan ba Orfanatu São Domingos Savio Venilale, iha loron 15 Novembru 2018.

Kordenadora GAAC-PR Amelia Soares Pinto ho Kordenadora Kaza Sivil Prezidénsia Repúblika Alcina de Jesus lori espoza Prezidente Repúblika Cidalia Nobre Guterres nia naran hatoo agradese no kontente ho Madre Filhas Maria Auxiliadora (FMA) nia vontade no korajen tomak hodi tau matan ba labarik orfanatu ne’ebé mak moris hosi família sira divorsiadu, balu inan, aman mate no balu kapasidade la too atu sustenta oan nia moris.

“Ami agradese ba madre sira tanba iha vontade di’ak hodi eduka labarik orfanatu sira sai labarik ida matenek, tanba ita hotu hatene katak labarik sira mak hanesan futuru nasaun nian. Ami laiha buat murak ida mak fo ba oan sira maibé iha de’it sasán nesesidade uitoan ne’ebé bele adianta moris loron balu nian” Kordenadora GAAC-PR Amelia Soares Pinto, hatete.

Ba tempu ida ne’e espoza labele marka prezensa hodi haree rasik alin orfaun sira nia kondisaun maibé, iha tempu oin mai sei vizita mai para haree labarik orfaun na’in 111 ne’ebé mai hosi Munisípiu Baucau nian.

“Maske ita nia inan nasaun espoza Prezidente la marka, maibé nia domin nafatin ho simplisidade tomak ba oan sira” Kordenadora haktuir.

Labarik orfaun sira sente kontente tebes ho prezensa hosi ekipa Gabinete Espoza Prezidente, ho de’it sentimentu kontente haktuir liu hosi múzika espresa sai labarik sira nia ksolok no domin ba inan nasaun ne’ebé hodi ona tulun.

Edita Isabel de Jesus nu’udar orfaun hatoo obrigado no agradese prezensa ekipa Gabinete Espoza Prezidente. “Ami fo obrigado no agradese ba prezensa ba ekipa ne’ebé mai hamutuk ona ami orfonatu no agradese ba nesesidade balu ne’ebé hodi ona mai ami”.

Madre Olga da Conceição Freitas Belo, FMA agradese ba inan nasaun liu hosi nia ekipa ne’ebé vizita ona, hodi rona no hatan ona ba difikuldade ne’ebé Orfonato ho madre sira hasoru.

“Tempu too ona ita Timoroan ajuda malu, sira ne’ebé iha ajuda fali sira ne’ebé laiha, tanba ne’e lori madre FMA agradese ba inan nasaun nian apoiu hirak ne’e, maske buat kiik maibé, ami sente hanesan domin boot ida mai ami”.

Madre Olga hatoo labarik orfaun sira mai hosi família sira ne’ebé la hanesan ho hahalok tanba ne’e, presiza vontade no korajen liuliu pasiénsia hodi kuidadu no eduka labarik orfaun sira.

Ekipa GAAC-PR hala’o vizita mós ba Eskola Tékniku Profisionál Maria Mazarello Venilale.

 

(Mídia PR)