Dili – Loron 13-14  Novembru  2018, Inspetoria TIN hala’o avaliasaun tinan 2018 nian no programasaun ba tinan 2019 nian, enkontru ida ne’e hala’o  iha salaun Jõão Paulo II Comoro Dili, partisipante sira mai husi komunidade ida-idak Irmán sira no inklui mós leigu nain 2 ne’ebé mai husi komunidade Maria Auxiliadora, Venilale no Komunidade Beata Laura Vicuña Laga. Ba loron dahuluk , loron 13, atividade ne’ebé hala’o mak uluknanai hahu ho orasaun  hora intermédia (terza) , hafoin liafuan bemvinda husi Madre Provinsial TIN, Madre Alma Castagna, ne’ebé hato’o kona ba modalidade foun ne’ebé hala’o ba programasaun tinan ida ne’e diferente ho tinan sira seluk, programasaun ba tinan ida ne’e sei la’o ho estilu Sínodu nian, reflesaun sira husi ikona Sínodu tinan ida ne’e nian nu’udar naroman ba ita nia programasaun. Molok remata madre Alma dezafia partisipante sira ho liafuan ne’ebé dehan: “karidade obras sira nian; dalaruma ita preukupa halo obra karidade maibé ita haluha atu halo karidade ne’ebé tenke hafalun ka tauk hotu ne’ebé iha, ita nia obra sira sei kriativa no foun tanba ita buka foinsa’e sira nia diak”.

Hafoin madre  hato’o tiha liafuan bemvinda kontinua ho aprezentasaun avaliasaun komunidade ida-idak nian no proposta  programasaun nian ba tinan 2019 hafoin fahe kedas ba grupo sira atu diskuti no fahe kona ba liña asaun sira ne’ebé hatama ona iha inspetoria.

Iha lorokraik aprezenta liña asaun sira iha Assembleia, hafoin   reza tersu hamutuk iha gruta Comoro, iha kalan iha aprezentasaun kriativa husi grupo ida-idak bazeia ba liña asaun ne’ebé hili: “Nu’udar  Komunidade Edukativa  ita valoriza Maromak Nia prezensa iha moris loro-loron,  aprende arte akompañamentu no dixernimetu iha ida-idak nia vokasaun no tau atensaun ba ambiente dijitál”. Nune’e grupo ida-idak inventa tuir sira nia kriatividade.

Iha loron 14, Novembru, atividade ne’ebé hanesan hahu ho orasaun, no introdusaun husi Madre Jacinta Gusmão ne’ebé foti husi Papa Francisco nia mensajen ne’ebé dehan: “Maromak Nia prezensa iha ita nia moris laiha limitasaun” hanesan  liña asaun ne’ebé  ita hili ba tinan ida ne’e nian. Hafoin diskusaun iha grupo no aprezenta modalidade sira iha assembleia, iha lorokraik  fahe ida-idak nia ambitu hafoin iha  assembleia jeral.

(Maria Sarmento Guterres)