Papa Francisco iha Angelus 15-12-2013

Maun no biin-alin sira, bondia!

Ohin domingu datoluk Adventu nian, hanaran mós domingu Gaudete,  katak domingu ksolok nian. Iha liturjiaita rona dala barak konvite atu haksolok, atu hadahur, tanba sá? Tanba Na’i besik ona. Natál besik ona. Mensajen kristaun hanaran “evanjellu”, etan ksolok iha nia, hetan iha nia ksolok loos!

Maibé ida Evanjellu nian la’ós ksolok naran de’it. Ninia razaun mai husi konxiénsia katak Maromak simu no hadomi ita. Hanesan ohin profeta Isaías fó hanoin (kf 35,1-6a.8a.10), Maromak mak ida ne’ebé mai atu salva ita, no fó tulun liuliu ba sira ne’ebé lakon dalan. Ninia vinda iha ita-nia leet habiit, hametin, fó korajen, halo rai fuik no rai-teruk maran haksolok, katak ita-nia moris bainhira sai maran. No bainhira mak ita-nia moris sai maran? Bainhira la iha bee Maromka nia Liafuan no ninia Espíritu domin nian. Maski ita-nia limite no ita-nia lakon-dalan boot oinsá karik bá, ita la iha lisensa atu sai fraku no bulelu iha difikuldade sira no iha ita-nia frakeza sira rasik nia oin. Ih akontráriu, ita simu konvite atu habiit ita-nia liman sira, atu hametin ita-nia ain-tuur sira, atu iha korajen no la bele ta’uk, tanba ita-nia Maromak hatudu beibeik ninia kbiit no laran-sadia. Nia haraik mai ita forsa atu la’o nafatin ba oin. Nia nafatin hamutuk ho ita atu tulun ita la’o ba oin. Nia mak Maromak ne’ebé hadomi liu ita, hadomi ita tan ne’e hamutuk ho ita, atu tulun ita, atu habiit ita no la’o ba oin!  Korajen! Bá oin nafatin! Hodi Ninia tulun ita bele hahú fali husi uluk. Oinsá? Ema ruma bele hateten mai ha’u: “Lae, Padre, ha’u halo barak liu… Ha’u ema sala-na’in boot liu… Ha’u labele hahú fali!” Ó la loos! Ó bele hahú fali husi! Tanba sá? Tanba Nia hein ó, Nia besik ba ó, Nia hadomi ó, Nia laran sadia. Nia perdua ó, Nia haraik kbiit ba ó atu hahú husi hun! Ba hotu! Entaun ita iha kbiit atu loke matan, atu manán laran-triste no tanis no hahú knanauk foun. No ksolok loos ne’e hela metin maski iha provasaun, iha terus mós, tanba la’ós ksolok superfisiál,maibé tama iha ema ne’ebé entrega an ba Maormak no konfia iha Nia.

Ksolok sarani, hanesan esperansa, soi nia fundamentu iha Maromak nia fidelidade, iha serteza katak Nia mantein nafatin Ninia promesa sira. Profeta Isaías husu ba sir ane’ebé lakon dalan no moris iha laran lahakmatek atu konfia iha Na’i nia fidelidade, tanba Ninia salvasaun la kleur tan atu natubu iha sira nia moris. Sira ne’ebé hetan Jezús iha sira-nia dalan, koko iha fuan hakmatek no ksolok ida iha ne’ebé la iha buat ida no ema ida bele hasai husi sira. Ita-nia ksolok mak Jezús Kristu, Ninia domin fiél ne’ebé la nahas! Maibé, bainhira sarani ida sai triste, ne’e dehan katak nia hadook an husi Jezús. Maibé ita keta husik nia mesak! Ita tenke reza ba nia, no halo nia sente komunidade nia domin.

Na’i-Feto Maria tulun ita atu halais ita-nia ain-hakat ba Be;ém, atu hasoru Kosok-Oan ne’ebé moris mai ita, ba ema hotu nia salvasaun no ksolok. Ba nia Anju hateten: «Haksolok bá, basá ita nakonu ho grasa: Na’i ho ita» (Lc 1,28). Atu nia tulun it amoris ksolok Evanjellu nian iha família, iha serbisu, iha parókia no iha ambiente hotu. Ksolok íntima ida, halo ho maravilla no laran-nurak. Hanesan bua tne’ebé inan ida koko bainhira hateke ba ninia kosok-oan foin moris, no sente katak nia mak Maromak nia don ida, milagre ida ne’ebé presiza agradese de’it!