Venilale – Escola Técnico-Vocacional sira husi kedas tinan 2013 hala’o Prova de Aptidão Profissional (PAP) ba finalista sira. “PAP konsiste iha aprezentasaun no defeza, iha júri ida nia oin, ba projetu pesoál ida, hamutuk ho ninia relatóriu finál, demonstrativu kona-ba matenek no kompeténsia profisionál sira (Regulamentu PAP art.2)”.

Ninia objetivu mak, nu’udar karákter profisionál, iha finalidade atu iha aplikasaun prátika efetiva ba projetu; iha karákter multidixiplinár; mobilizasaun no aplikasaun aprendizajen produtiva sira iha área formasaun programa produtivu nian no dezenvolvimentu kapasidade integrasaun nian iha meiu laborál no profisionál.

Ba ETV Hotelaria e Turismo, S. Maria Mazzarello ne’ebé iha área aprendizajen rua hanesan “Técnico-Alimentar” no “Hotelaria”, nune’e estudante sira hamutuk na’in 55 (mane 14 no feto 41) aprezenta sira-nia projetu sira tuir área rua ne’e. Ezemplu tópiku nian mak “Standard operational room service”, “Tipo de sopas de carne”, nst.

Ezame ne’e hala’o iha etapa sira hanesan tuirmai ne’e: ante protetu PAP; momentu dahuluk avaliasaun intermédia; momentu daruak avaliasaun intermédia PAP nian; entrega relatóriu finál PAP; aprezentasaun no defeza PAP; avaliasaun PAP.

Ezame PAP hala’o husi loron 5 to’o loron 8 Novembru iha ETV S. Maria Mazzarello, Venilale. Júri kompostu husi profesór/a sira no mós husi Ministériu Edukasaun ninia reprezentante ida. Maski iha regulamentu husu atu iha júri iha mós husi SEFOPE no husi profisionál sira (empreza), maibé tan razaun ruma, ida-ne’e la realiza.

Estudante sira haksolok bele remata sira-nia ezame hotu maski sira sente anseidade boot liuliu ba PAP ida-ne’e.