Liturjia Domingu da-32 Tempu Komún nian ko’alia mai ita kona-ba kultu loos ne’ebé ita tenke fó ba Maromak. Maromak laiha interese ba manifestasaun relijioza boboot, maibé atitude permanente ida saran-an nian iha Nia liman, disponibilidade ba Ninia projetu sira, hakohak ho laran-luak ninia dezafiu sira, serví maun-alin ho an tomak.

Leitura dahuluk aprezenta mai ita ezemplu feto kiak ida nian husi Sarepta, ne’ebé, maski kiak no iha nesesidade, disponivel atu simu apelu sira, dezafiu sira no don sira husi Maromak. Feto-faluk ne’e nia istória ne’ebé fahe ho profeta ai-han uitoan ne’ebé iha, garante mai ita katak laran-luak, partilla no solidariedade la halo ema sai kiak, maibé haburas vida no vida ne’ebé naresin.

Evanjellu haktuir liuhusi feto kiak seluk, faluk ida tan, sá loos mak kultu loos ne’ebé Maromak hakarak husi nia oan sira: atu sira iha kapasidade atu oferese ba Nia buat hotu, iha doasaun kompleta, iha domin lahó limite no lahó kondisaun sira. Ema kiak sira de’it, katak sira ne’ebé laiha fuan nakonu ho an rasik, iha kbiit atu oferse ba Maromak kultu loos ne’ebé Nia hein.

Leitura daruak oferese mai ita Kristu nia ezemplu, amlulik-boot ne’ebé saran nia vida ba ema sira nia salvasaun. Nia hatudu, ho niia sakrifísiu, sá loos don perfeitu ne’ebé Maromak hakarak no hein husi nia oan ida-idak. Liufali osan ka soin materiál seluk, Maromak hein husi ita ita-nia moris nia don, ba projetu salvasaun ne’ebé Nia iha ba ema sira.

Download