Dili –  Iha 3  Novembru, enkontru juniora FMA  zona Dili nian, hala’o iha Casa Saõ José Noviciado. Juniora na’in 8  husi komunidade sira Dili nian. Tópiku ne’ebé aprezenta husi Madre Alma ko’alia kona ba “ Orientasaun ba etapa formativa junioradu nian”.  Iha enkontru  ne’e , madre aprezenta kona-ba tema husi kapitulu ida-idak, hafoin  hato’o mos introdusaun husi tópiku ne’e. Molok atu aprezenta, hahu uluk  ho partilla iha grupo kona-ba ikone ne’ebé hili ba etapa junioradu , “ kona-ba festa kazamentu Kana”, hanesan reflesaun ne’ebé grupu sira aprezenta katak.   Jesus no Maria iha Kana mak nu’udar mediadór/a no inspiradór/a,  atan sira refere ba diretora no formadora sira tanba hanesan Na’i-Feto nia papel iha festa mak nu’udar mediadora nune’e nia orienta ka hato’o ba Jesus mak halo milagre, hanesan mos diretora nia tulun no orienta irman junior maibe atu grasa no bensan husi Maromak Nia parte, no mos husi ema nia hakas-an rasik. Kusi ne’e mak reprezenta irman juniora sira, haree ba kusi ida-idak nia medida lahanesan, nune’e mos irman ida-idak mos diferente, iha kapasidade, talentu, karater, nst. Tua mak nu’udar Maromak Nia grasa no virtude diak sira; festa mak refere ba komunidade ida,  tanba iha festa ne’e representa ema oioin ne’ebé sai nu’udar konvidadus, nune’e mos ita nia moris iha komunidade laos ita mesak maibe moris hamutuk ho ema oioin ne’ebé lahanesan. Ikus liu kusi 7 ne’ebé iha ikona hakarak dehan neen reprezenta numéru ne’ebé hakerek iha evanjellu no aumenta ida mak reprezenta Jesus ne’ebé sai nu’udar fonte hodi fornese tua ba kusi ida-idak ne’ebé mamuk.

Hafoin partilla iha grupo, madre aprezenta kedas tema kapitulu ida-idak no introdusaun; iha introdusaun  ne’e fahe ba parte 4:

• Institutu husu ba Nia-an:  presiza halo dialogo ho realidade no ho Fundadór/a sira nia esperiensia espirituál.
• Madre jeral nia relatóriu iha Kapítulu jerál XXIII; urjensia akompañamentu juniores nian. Liña unitária sira atu propoen ba faze formative no atu tau matan preparasaun formadora sira nian.
• Ambitu formasaun nia hilin; envolve ema barak, forma jerasaun foun sira ba Evanjellu relijiozu no afirma fila fali nesesidade formasaun kontinua.
• Prosesu nia hakat; rona realidade, envolvimentu no partisipasaun, ekipa ne’ebé luan, komisaun internasional no konfrontu interkongregasional no interkultural.

Ne’e mak introdusaun badak ne’ebé madre hato’o, sei kontinua iha momentu seluk mak sei haklean tópiku ida-idak. Hodi enkontru ida ne’e ho selebrasaun badak iha  ne’ebé irman ida-idak halo reflesaun no halo empeñu ba ninia jornada pessoal ba tinan ida ne’e.

(Maria Sarmento Guterres)