Baucau – Haburas kultura agradesimentu la’ós  buat ruma fasil. Ohin loron iha mentalidade katak buat hotu mak nu’udar direitu ida maibé haluha devér rasik. Don Bosco no Madre Mazzarello hanorin atu ema ida-idak reflete kona-ba don hotu nia simu degrasa husi Maromak no maun-alin sira.

Tanba atu agradese presiza hatene kontempla, nune’e, ami selebra festa agradesimentu nian iha Tasi-Ibun furak ida iha Baucau. Husi Komunidade Edukativa Madre Mazzarello (Venilale), katak, FMA, estudante no profesór/a sira, pesoál hotu hamutuk ho padre kapelaun, Pe. Abrão SDB, hahí Maromak ba ninia kmanek furak iha tinan ida-ne’e.

Prepara ba festa ne’e ho orasaun ba malu semana ida molok, no nia tutun mak selebra loron 27 Outubru. Hahú ho Santa Missa no kontinua ho jogu sira. Hafoin almosu no kumprimenta malu. Loron ne’e mós loron despedida ba finalista sira. Ho ksolok no matan-been kahur malu, klase ida-idak hato’o ninia knananuk no dansa. Finalista sira, ho modu espesiál fahe mós prezente ka rekordasaun. Hafoin labele la iha, aproveita luku no nani iha tasi.

Obrigada ba ita-nia moris hamutuk iha tinan ne’e. Obrigada ba akompañamentu ne’ebé ita fó ba malu no ba buat hotu ita fahe iha tinan ne’e.