Liturjia Domingu da-30 ne’e nian ko’alia mai ita kona-ba Maromak nia preokupasaun atu ema hetan moris loos no hatudu dalan ne’ebé presiza atu to’o ba finalidade ne’e. Tuir  Maromak nia Liafuan be ohin propoin mai ita, ema to’o ba moris nakonu, hodi adere ba Jezús no hakohak proposta salvasaun ne’ebé Nia aprezenta mai ita.

Leitura dahuluk afirma katak, mask iha momentu dramátiku liu iha Israel nia istória, bainhira povu la hetan naroman no liberdade, Maromak iha ne’ebá, preokupa atu liberta ninia Povu no kaer nia liman hodi lori nia, ho domin Aman nian, ba hasoru liberdade no moris nakonu.

Leitura daruak aprezenta Jezús nu’udar amlulik-boot ne’ebé Aman bolu no haruka ba mundu atu lori ema sira ba komuñaun ho Maromak. Ho aprezentasaun ida-ne’e, autór testu ne’e nian sujere, uluknanai, Maromak nia domin ba nia Povu; no iha fatin daruak, husu ba fiar-na’in sira atu “fiar” iha Jezús – katak, rona ho atensaun  proposta sira ne’ebé nia halo, simu iha fuan no nakfilak ba jestu konkretu vida nian.

Iha Evanjellu, katekista Marcos propoin mai ita Maromak nia dalan atu liberta ema husi nakukun no halo nia moris hikas ba roman. Hanesan ema matan-delek Bartimeu, fiar-na’in sira simu konvite atu hakohak Jezús nia proposta atu husik desididamente moris tuan no tuir Jezús iha dalan domin nian no iha don moris nian. Halo nune’e, Marcos garante, ita bele hakat husi eskravidaun ba liberdade, husi mate ba moris.

Download