Dili – Iha loron 13 Outubro komunidade Divina Providensia selebra festa agradesementu komunidade nian. Tema ba festa agradesementu ne’e mak: “Hamutuk  ho Maria ho ksolok ami agradese” no foti ikona husi Maria iha Kana.

Nu’udar preparasaun ba festa agradesementu ne’e, komunidade halibur hamutuk hodi reza ba malu. Nune’e hahu husi segunda-feira dia 08 to’o dia 12 (Sexta-feira) komunidade reza ba malu hahu dadeer iha orasaun Laudes no taka ho tersu hamutuk. Loron-loron menina sira troka malu prepara orasaun Tersu tuir ida-idak nia inisiativa no iha loron festa agradesementu Irman sira hamutuk ho menina sira hahi no agradese ba Na’i liu-husi Santa Missa ne’ebé preside husi Pe. Manuel Fraile.

Missa ne’e selebra iha loron Sabadu lokraik no uza selebrasaun/ missa Vespertina. Iha homilia padre hahu ho liafuan tolu ne’ebé Amo papa Fransisco husu ba sarani sira atu moris tuir. Padre dehan: “Liafuan tolu ne’ebé tulun atu hametin familia kristaun sira nian mak liafuan “Lisensa, deskulpa no Obrigada.” Ita ida-idak mós aprende atu pratika liafuan tolu ne’e iha ita nia moris loro-loron. Padre hatutan tan nia homilia hodi foka liu ba Evanjellu ne’ebé ko’alia kona-ba foinsae riku hodi kompara ho B. Alexandrina nia moris. Iha Evanjellu foinsa’e ida Ne’ebé husu ba Jezús: “Oinsa atu hetan moris rohan laek?” Jezús hatan ho domin boot no husu ba foinsa’e ne’e atu moris tuir ukun fuan sira. Ikus liu Jezús husu ba foinsa’e ne’e atu fa’an nia riku soin hotu hodi tuir Nia. Foinsa’e ne’e fila ho laran susar tanba nia iha riku-soin barak.

Iha mundu ohin loron, atu husik rikusoin no tuir Jezús dala barak laos fasil ba ema hotu maibe ba Beata Alexandrina ne’ebé ohin selebra ninia memoria, buat ne’e fasil ba nia atu hala’o tanba ninia domin ba Jezus boot tebes. Nia pronto atu mate tan deit domin ba Jezús no durante iha Beata ne’e nia moris hatudu katak Jezús mak sai aihan moris nian ba nia no iha nia sofrimentu sira, nia hasa’e ba Jezús tan ho Jezús halo nia sai haksolok nafatin. Hodi konta kona-ba Beata ne’e nia moris, Padre mós husu ba irman sira atu konta oituan istória B. Alexandrina nian ba menina sira atu bele sai ezemplu moris ba sira ida-idak.

Depoizde misa kontinua kedas ho reza tersu hafoin han hamutuk. Ikus liu taka ho konviviu ne’ebé prepara husi Irman no menina sira hafoin Me. Veronika fó Boanoite hodi konta oituan tradisaun saleziana oinsa hahu festa agradesementu ne’ebé tinan-tinan Irman sira selebra. Me. Veronika foti liafuan agradese husi lian Indonezia ne’ebé dehan “Terima Kasih” = “Simu, Fó/domin”. Ita simu, ita fó. Ita agradese tanba ita simu (Terima). Uluk knanain agradese ba Maromak tanba simu moris husi Nia; agradese inan-aman, ita nia familia, ema sira ne’ebé ita hasoru iha ita nia moris no agradese ba buat hotu ne’ebé ita simu ona nune’e ita bele hanesan agora.  Agora, oinsa atu agradese? Agradese hodi “fó” (kasih). No ita la bele dehan katak ita la iha buat ida atu fó hanesan Amo Papa Francisco dehan ba foin-sae sira, tanba ita iha ita-nia an rasik atu bele fó. Agradese ba Maromak hodi fó fali moris ne’ebé Nia fó.

Loron tuir mai, iha loron Domingo komunidade halo paseiu hamutuk iha Cristo Rei. Momentu ne’e sai oportunidade di’ak hodi ba haksolok hamutuk no fahe ksolok ba malu nu’udar familia ida.

(Komunidade DP)