Hilin revista amerikana nian

 

RV – Papa Francisco haksolok sai eleitu “Person of the Year” husi revista amerikana Time, tanba hilin ne’e tulun haklaken Evanjellu ba ema barak liután, portavós haktuir.

Padre Federico Lombardi, diretór Sala Imprensa Santa Sé nian komenta ho modu pozitivu no lahó surpreza anúnsiu husi diretora revista semanál amerikana, Nancy Gibbs.

“Ida ne’e laós surpreendente, tanba ita haree resonánsia boot no atensaun ne’ebé fó ba Papa Francisco nia eleisaun no iha inísiu pontifikadu foun nian”, Lombardi haktuir.

 

Tuir portavós Vaticano nian, “ne’e sinál pozitivu ida katak rekoñesimentu ho prestíjiu iha área imprensa internasionál fó ba ema ida ne’ebé haklaken ba mundu valór espirituál, relijiozu no morál sira, no esprime ho modu efetivu ba dame no justisa boot liután”.

Padre Lombardi hateten katak Amu-Papa “la buka fama no susesu: nia simplesmente hala’o servisu anúnsiu Evanjellu  Maromak nia domin nian ba ema hotu”.

“Se buat ne’e dada mane no feto sira no fó esperansa ba sira, Amu-Papa haksolok. Se hilin ida-ne’e ‘Person of the Yearo’ signifika katak ema barak komprende ona mensajen ne’e, maski  ho modu implísitu, nia konserteza haksolok”, padre Lombardi hatutan.

Aleinde eleitu nu’udar “Person of the Year”, Papa Francisco mós sai asuntu ne’ebé ema komenta barak liu iha mundu Facebook nian iha 2013, tuir buat ne’ebé rede sosiál ne’e rasik fó sai, hodi supera tiha Obama ninia eleisaun foun no bebé liurai Inglaterra nian.